സ്ത്രീത്വത്തെ അപമാനിച്ച ചെന്നിത്തല മാപ്പ് പറയണം: മന്ത്രി ശൈലജ
തിരുവനന്തപുരം > സ്ത്രീത്വത്തെ അപമാനിക്കുന്ന പ്രസ്താവന നടത്തിയ പ്രതിപക്ഷ നേതാവ് രമേശ് ചെന്നിത്തല മാപ്പ് പറയണമെന്ന് ആരോഗ്യമന്ത്രി കെ കെ ശൈലജ. കോവിഡ് ബാധിതയായ യുവതിയെ പീഡിപ്പിച്ചതിന് അറസ്റ്റിലായ എന്ജിഒ അസോസിയേഷന് നേതാവും കോണ്ഗ്രസ് പ്രവര്ത്തകനുമായ പ്രദീപ് കുമാറിനെ ചെന്നിത്തല ന്യായീകരിച്ചതിനെ തുടര്ന്നാണ് മന്ത്രിയുടെ പ്രതികരണം. സ്ത്രീകളെ അപമാനിക്കുന്ന ഒരു കുറ്റവാളിക്കും ആരോഗ്യ വകുപ്പില് സ്ഥാനമുണ്ടാകില്ലെന്നും മന്ത്രി പറഞ്ഞു.
ചൊവ്വാഴ്ച്ച നടത്തിയ വാര്ത്താസമ്മേളനത്തിലാണ് ചെന്നിത്തല വിവാദ പ്രസ്താവന നടത്തിയത്. യുവതിയെ പീഡിപ്പിച്ചതിന് അറസ്റ്റിലായ കുളത്തൂപ്പുഴ ഗവ. ആശുപത്രിയിലെ ജൂനിയര് ഹെല്ത്ത് ഇന്സ്പെക്ടര് പ്രദീപ് കുമാര് കോണ്ഗ്രസ് അനുകൂല സംഘടനാ നേതാവല്ലേ എന്നായിരുന്നു മാധ്യമപ്രവര്ത്തകരുടെ ചോദ്യം. എന്നാല് 'ഡിവൈഎഫ്ഐക്കാര്ക്കേ പീഡിപ്പിക്കാന് പറ്റൂ എന്ന് എഴുതിവെച്ചിട്ടുണ്ടോ' എന്ന മറുപടിയാണ് ചെന്നിത്തല നല്കിയത്. പീഡനത്തെ നിസാരവത്കരിക്കുകയും പ്രതിയെ തള്ളിപ്പറയുകപോലും ചെയ്യാതിരുന്ന ചെന്നിത്തലയ്ക്കെതിരെ വലിയ പ്രതിഷേധമാണ് ഉയരുന്നത്.
എന്ജിഒ അസോസിയേഷന് കാറ്റഗറി സംഘടനയായ ഹെല്ത്ത് ഇന്സ്പെക്ടേഴ്സ് അസോസിയേഷന്റെ സജീവ പ്രവര്ത്തകനാണ് അറസ്റ്റിലായ പ്രദീപ് കുമാര്. കോവിഡ് രോഗികളുടെ നിരീക്ഷണവുമായി ബന്ധപ്പെട്ട് പൊലീസിന് അധിക ചുമതല നല്കിയ തീരുമാനത്തിനെതിരെ ഇയാളുടെ നേതൃത്വത്തിലാണ് കോടതിയെ സമീപിച്ചത്. അങ്കണവാടി ജീവനക്കാരിയോട് അപമര്യാദയായി പെരുമാറിയതിന് ഇയാളുടെ പേരില് കേസുണ്ട്. പ്രദീപ് കുമാര് പ്രദേശത്തെ കോണ്ഗ്രസ് നേതാക്കളുമായി അടുത്ത ബന്ധം പുലര്ത്തിയിരുന്നതായി പ്രദേശവാസികള് പറഞ്ഞു.