സമൂഹ മാധ്യമങ്ങള്‍ വഴി നടത്തുന്ന കുറ്റകൃത്യങ്ങള്‍ തടയാന്‍ നിയമഭേദഗതി
തിരുവനന്തപുരം : സാമൂഹിക മാധ്യമങ്ങള്‍, ഓണ്‍ലൈന്‍ മാധ്യമങ്ങള്‍ എന്നിവ വഴി വ്യക്തിഹത്യകളും അധിക്ഷേപങ്ങളും ഭീഷണിപ്പെടുത്തലും അടക്കമുള്ള കുറ്റകൃത്യങ്ങള്‍ തടയാന്‍ കേരള പോലീസ് ആക്ടില്‍ കൂടുതല്‍ വകുപ്പുകള്‍ ഉള്‍പ്പെടുത്തി നിയമഭേദഗതി . ഇത്തരക്കാര്‍ക്കെതിരേ പ്രത്യേക വകുപ്പുകള്‍ പ്രകാരം നിലവില്‍ കേസെടുക്കാന്‍ കഴിയാത്ത സാഹചര്യത്തിലാണു നിയമ ഭേദഗതിക്കു മന്ത്രിസഭ അംഗീകാരം നല്‍കിയിരിക്കുന്നത് .
ഓണ്‍ലൈന്‍ മാധ്യമങ്ങളും സാമൂഹിക മാധ്യമങ്ങളും വഴി ദുഷ്പ്രചാരണം നടത്തുന്നവര്‍ക്കെതിരേ കേസെടുക്കാന്‍ കേരള പോലീസ് ആക്ടില്‍ 118 എ എന്ന വകുപ്പു കൂടി ഉള്‍പ്പെടുത്തി . നേരത്തെ കേസെടുത്തിരുന്ന ഐടി ആക്ടിലെ 66 എയും കെപി ആക്ടിലെ വകുപ്പും സുപ്രീംകോടതി റദ്ദാക്കിയിരുന്നു. ഇതേത്തുടര്‍ന്ന് പ്രതികള്‍ക്കെതിരെ കേസെടുത്താലും അറസ്റ്റ് ചെയ്താലും ഉടനടി ജാമ്യം ലഭിച്ചിരുന്നു.
ഡബിംഗ് ആര്‍ട്ടിസ്റ്റ് ഭാഗ്യലക്ഷ്മിക്കെതിരേ സോഷ്യല്‍ മീഡിയ വഴി അധിക്ഷേപം നടത്തിയ ആള്‍ക്കെതിരേ പോലീസ് ദുര്‍ബല വകുപ്പുകള്‍ ചുമത്തിയെന്ന ആരോപണം ഉയര്‍ന്നുവന്നിരുന്നു . ഈ സാഹചര്യത്തിലാണ് ഇക്കാര്യം പരിശോധിച്ചത്.
ഇപ്പോഴത്തെ ഭേദഗതി പ്രകാരവും സോഷ്യല്‍ മീഡിയ വഴി വ്യക്തിഹത്യയും മറ്റും നടത്തുന്നവര്‍ക്കും കേസില്‍ ജാമ്യം ലഭിക്കും . കേന്ദ്ര ഐടി ആക്ടില്‍ കൂടി ഭേദഗതി വരുത്തിയാല്‍ മാത്രമേ ഇത്തരക്കാര്‍ക്കെതിരേയുള്ള പോലീസ് നടപടി കൂടുതല്‍ കര്‍ക്കശമാക്കാന്‍ പറ്റു .
Related News