മലബാറിന്റെ പ്രൊഫഷനൽ സ്വപ്നങ്ങൾക്ക് ചിറകുനൽകി കല്യാശ്ശേരി സിവിൽ സർവീസ് അക്കാദമി
വിവിധ ജില്ലകളിൽ നിന്നായി 120 പേരാണ് ഇവിടെ നിന്നും പ്രതിവർഷം സിവിൽ സർവ്വീസ് പരീക്ഷയ്ക്കായി പരിശീലനം നേടുന്നത്. ഇതിൽ 64 സീറ്റുകളുള്ള ഈ വർഷത്തെ റെഗുലർ ക്ലാസുകൾ ജൂൺ മാസം ആരംഭിച്ചു. 60 പേർ നിലവിൽ ഈ ബാച്ചിൽ പ്രവേശനം നേടി. തൽസമയ പ്രവേശനം ഇപ്പോഴും തുടരുന്നു. ഒരു വർഷത്തെ പ്രിലിംസ് കം മെയിൻസ് പരീക്ഷാ പരിശീലനമാണ് അവധി ദിനങ്ങളിൽ നൽകുന്നത്. പൊതു അവധി ദിനങ്ങളിലും രണ്ടാം ശനി, ഞായർ ദിവസങ്ങളിലുമാണ് ക്ലാസുകൾ നടക്കുക. ഇതോടെ സിവിൽ സർവീസ് സ്വപ്നം കാണുന്നവർക്ക് തൊഴിൽ മേഖലയിൽ നിന്നുകൊണ്ടു തന്നെ തങ്ങളുടെ ലക്ഷ്യത്തിലേക്ക് എത്താനുള്ള വഴി തുറക്കും.
പ്രവേശന പരീക്ഷയിലൂടെയാണ് തെരഞ്ഞെടുപ്പ്. 51 ശതമാനം സീറ്റുകൾ എസ് സി, എസ് ടി വിഭാഗങ്ങൾക്ക് സംവരണം ചെയ്തിട്ടുണ്ട്. ഇതോടൊപ്പം വിവിധ സ്കോളർഷിപ്പുകളും നൽകുന്നു. സംസ്ഥാനത്തെ സിവിൽ സർവീസ് അക്കാദമികളിൽ 100 വിദ്യാർഥികൾക്ക് വരുമാനത്തിന്റെ അടിസ്ഥാനത്തിൽ സ്കോളർഷിപ്പും നൽകുന്നു. കേരള അഡ്മിനിസ്ട്രേറ്റീവ് സർവീസ് (കെഎഎസ് ) പരിശീലനവും ഇവിടെ നടക്കുന്നു.
ചെറിയ കാലയളവിനുള്ളിൽ നിരവധി നേട്ടങ്ങളും അക്കാദമിയെ തേടിയെത്തി. 2019ലെ കെ എ എസ് പ്രാഥമിക പരീക്ഷ, പി എസ് സി പരീക്ഷകൾ, വിവിധ മത്സര പരീക്ഷകൾ എന്നിവയിലും നിരവധി വിദ്യാർഥികൾക്ക് വിജയം കൈവരിക്കാൻ സാധിച്ചു. കുറഞ്ഞ ചെലവിൽ മികച്ച പരിശീലനം നേടി വിജയം കൈവരിക്കാൻ സിവിൽ സർവീസ് അക്കാദമി വിദ്യാർഥികളെ പ്രാപ്തരാക്കുന്നുവെന്നും പ്രൊഫഷണലുകൾക്കടക്കം പരിശീലനം നൽകുന്നതോടെ കൂടുതൽ പേർക്ക് സിവിൽ സർവീസ് സാധ്യതകൾ തുറക്കുകയാണെന്നും കല്ല്യാശ്ശേരി പരിശീലന കേന്ദ്രം കോർഡിനേറ്റർ കെ ശിവകുമാർ പറഞ്ഞു.