ഛത്തീസ്​ഗഡിൽ 22 മാവോയിസ്റ്റുകൾ അറസ്റ്റിൽ: സ്ഫോടകവസ്തുക്കൾ പിടിച്ചെടുത്തു

News Desk

17 April 2025 11:00 PM

ഛത്തീസ്​ഗഡിലെ ബീജാപൂരിൽ 22 മാവോയിസ്റ്റുകളെ അറസ്റ്റ് ചെയ്തു. ഇവരിൽ നിന്ന് സ്ഫോടക വസ്തുക്കളടക്കം പിടിച്ചെടുത്തു. മൂന്നിടങ്ങളിൽ നിന്നാണ് സ്ഫോടക വസ്തുക്കൾ പിടികൂടിയത്. ഉസൂർ പൊലീസ് സ്റ്റേഷൻ പരിധിയിലുള്ള ടെക്മെറ്റ്ല വില്ലേജിലെ കാട്ടിൽ നിന്നാണ് ഏഴുപേരെ പിടികൂടിയത്. ജം​ഗ്ല പൊലീസ് സ്റ്റേഷൻ പരിധിയിലെ ബെൽചാർ ​ഗ്രാമത്തിൽ നിന്ന് ആറുപേരെയും നെലാസ്നാർ പൊലീസ് സ്റ്റേഷൻ പരിധിയിലെ കണ്ടകർക ​ഗ്രാമത്തിലെ കാട്ടിൽ നിന്ന് 9 പേരെയും പിടികൂടി. കോബ്ര ടീമും ലോക്കൽ പൊലീസും സംയുക്തമായി നടത്തിയ തിരച്ചിലിലാണ് ഇവർ അറസ്റ്റിലായത്. ടിഫിൻ ബോംബുകൾ, ജലാറ്റിൻ സ്റ്റിക്, ഇലക്ട്രിക് വയറുകൾ, ബാറ്ററി, ലഘുലേഖകൾ തുടങ്ങിയവ പിടിച്ചെടുത്തു. അറസ്റ്റിലായ നക്സലൈറ്റുകളെല്ലാം 19നും 45നും ഇടയിൽ പ്രായമുള്ളവരാണെന്ന് അധികൃതർ വ്യക്തമാക്കി.