ഓസീസ് ടെസ്റ്റ്; ഇന്ത്യൻ വനിതകൾ ശക്തമായ നിലയിൽ; 157 റൺസിന്റെ ലീഡ്

News Desk

22 December 2023 05:48 PM

ഓസ്ട്രേലിയയ്ക്കെതിരായ ഏക ടെസ്റ്റ് മത്സരത്തിൽ ഇന്ത്യൻ വനിതകൾ ശക്തമായ നിലയിൽ. രണ്ടാം ദിവസം സ്റ്റമ്പെടുക്കുമ്പോൾ ഇന്ത്യൻ വനിതകൾ ഏഴ് വിക്കറ്റ് നഷ്ടത്തിൽ 376 റൺസെടുത്തിട്ടുണ്ട്. നിലവിൽ ഇന്ത്യൻ വനിതകൾക്ക് 157 റൺസിന്റെ ലീഡുണ്ട്. അർദ്ധ സെഞ്ചുറി പിന്നിട്ട ദീപ്തി ശർമ്മയ്ക്കൊപ്പം പൂജ വസ്ത്രേക്കറും ക്രീസിലുണ്ട്. ഇരുവരുടെയും കൂട്ടുകെട്ട് 100 റൺസ് പിന്നിട്ടു.

ഒന്നാം ഇന്നിം​ഗ്സിൽ ഓസ്ട്രേലിയയെ വെറും 219 റൺസിൽ പുറത്താക്കാൻ ഇന്ത്യയ്ക്ക് സാധിച്ചിരുന്നു. നാല് വിക്കറ്റെടുത്ത പൂജ വസ്ത്രേക്കറും മൂന്ന് വിക്കറ്റെടുത്ത സ്നേഹ് റാണയും ഓസ്ട്രേലിയയെ തകർത്തെറിഞ്ഞു. ദീപ്തി ശർമ്മ രണ്ട് വിക്കറ്റും വീഴ്ത്തി. ആദ്യ ദിനം ഇന്ത്യയുടെ മറുപടി ഒന്നിന് 98 റൺസായിരുന്നു. 40 റൺസെടുത്ത ഷഫാലി വർമ്മയുടെ വിക്കറ്റാണ് ആദ്യ ദിനം ഇന്ത്യയ്ക്ക് നഷ്ടമായത്.

74 റൺസെടുത്ത സ്മൃതി മന്ദാനയുടെയും 52 റൺസെടുത്ത റിച്ച ഘോഷിന്റെയും 73 റൺസെടുത്ത ജമീമ റോഡ്രി​ഗ്സും തകർപ്പൻ ഇന്നിം​ഗ്സുകൾ രണ്ടാം ദിനം ഇന്ത്യയെ മുന്നോട്ടു നയിച്ചു. പക്ഷേ ക്യാപ്റ്റൻ ഹർമ്മൻപ്രീത് കൗർ റൺസെടുക്കാതെയും ഒരു റൺസെടുത്ത് യാസ്തിക ഭാട്ടിയയും വേ​ഗത്തിൽ വിക്കറ്റ് നഷ്ടമാക്കി. മത്സരം അവസാനിക്കുമ്പോൾ ദീപ്തി ശർമ്മ 70 റൺസോടെയും പൂജ 33 റൺസുമായും ക്രീസിൽ തുടരുകയാണ്.