102 പേർക്ക് തൊഴിൽ നൽകി കഴക്കൂട്ടം മെഗാ ജോബ് ഫെസ്റ്റ്.312 പേർ അടുത്ത റൗണ്ടിലേക്ക് ഷോർട്ട് ലിസ്റ്റ് ചെയ്യപ്പെട്ടു
നവകേരള സദസ്സിന് മുന്നോടിയായി കഴക്കൂട്ടം മണ്ഡലത്തിൽ സംഘടിപ്പിച്ച മെഗാ ജോബ് ഫെസ്റ്റിൽ സ്പോട്ടിൽ നിയമന ഉത്തരവ് ലഭിച്ചത് 102 പേർക്ക്. 312 പേരെ രണ്ടാംഘട്ട അഭിമുഖത്തിനായി ഷോർട്ട് ലിസ്റ്റ് ചെയ്തു. കഴക്കൂട്ടം ജോബ് ഫെസ്റ്റിന്റെ നാലാമത് എഡിഷനിൽ 125 കമ്പനികൾ പങ്കെടുത്തപ്പോൾ 1612 തൊഴിലന്വേഷകരാണ് തൊഴിൽ തേടിയെത്തിയത്. ഇതിൽ 511 പേരും സ്പോട്ട് രജിസ്ട്രേഷൻ ആയിരുന്നു. കഴക്കൂട്ടം ജോബ്ഫെസ്റ്റിന്റെ ആദ്യ മൂന്ന് എഡിഷനുകളിലായി ആയിരത്തിലധികം പേർക്കാണ് ജോലി ലഭിച്ചത്.
പോസ്റ്റ് ഗ്രാജ്യൂവേറ്റ്/എം.ബി.എ. ബിരുദദാരികൾ, നഴ്സിംഗ്/ ആരോഗ്യമേഖല, ബി.ടെക് /എം.ടെക് ബിരുദധാരികൾ, ഐടിഐ./ ഡിപ്ലോമ/ മറ്റു വൈദഗ്ദ്യ തൊഴിൽ മേഖല, ബിരുദദാരികൾ, പ്ലസ് ടു/SSLCക്കാർ തുടങ്ങി വിവിധ മേഖലകളിലേക്കാണ് അഭിമുഖങ്ങൾ നടന്നത്.
അദാനി വിഴിഞ്ഞം പോർട്ട്, ലുലു ഗ്രൂപ്പ്, ബോഡി ഗിയർ ഇന്റർനാഷണൽ, കോൺഫിഡൻറ് ഗ്രൂപ്പ്, വി ഫൈവ് ഹോംസ്, എച്ച്ഡിഎഫ്സി ലൈഫ്, ഐസിഐസിഐ, ടാറ്റ എഐഎ, ആദിത്യ ബിര്ല തുടങ്ങിയ ഇന്ഷുറന്സ് കമ്പനികള്, സ്വിഗ്ഗി, ഇ സാഫ്, ഭാരത് ബെൻസ്, എസ്പി ഫോർട്ട് ഹോസ്പിറ്റൽ, പ്രമേരിക്ക ലൈഫ് ഡിഫൻസ് ചാനൽ, സ്കാവിൻ മെഡിക്കൽ, സുപ്രീം ഫുഡ്സ് തുടങ്ങിയ ഒട്ടേറെ പ്രമുഖ സ്ഥാപനങ്ങളാണ് പങ്കെടുത്തത്. പ്രമുഖ സ്റ്റാർട്ടപ്പുകളായ ജെൻ റോബോട്ടിക്സ്, ഇന്റർവെൽ, ക്യൂമെട്രോൺ എന്നിവയുടെ പങ്കാളിത്തവും ശ്രദ്ധേയം ആയിരുന്നു.
ജോബ് ഫെസ്റ്റിന്റെ ഉദ്ഘാടനം കടകംപള്ളി സുരേന്ദ്രൻ എം.എൽ.എയുടെ സാന്നിധ്യത്തിൽ തൊഴിൽ - സാംസ്കാരിക വകുപ്പ് സെക്രട്ടറി മിനി ആന്റണി ഉദ്ഘാടനം ചെയ്തു. തൊഴിൽ മേഖലയിലെ ഏറ്റവും കൂടുതൽ സംരംഭകരെ ഉൾക്കൊള്ളുന്നത് കഴക്കൂട്ടം മണ്ഡലത്തിലാണെന്നും ഒരാൾക്ക് അയാൾ ഇഷ്ടപ്പെടുന്ന മേഖലയിൽ തൊഴിൽ നൽകാൻ കഴിയുന്നത് വളരെ വലിയ കാര്യമാണെന്നും മിനി ആന്റണി പറഞ്ഞു. ഒരാൾക്ക്
കിൻഫ്ര, അസാപ് കേരള, കേരള നോളജ് ഇക്കോണമി മിഷൻ, കേരള സ്റ്റാർട്ടപ് മിഷൻ, ജില്ലാ എംപ്ലോയ്മെന്റ് ഓഫീസ്, ടെക്നോപാർക്ക്, ഫ്യുച്ചർ ലീപ് തുടങ്ങിയ സ്ഥാപനങ്ങളുടെ നേതൃത്വത്തിലാണ് ജോബ് ഫെസ്റ്റ് സംഘടിപ്പിച്ചത്.
കഴക്കൂട്ടം അൽസാജ് കൺവെൻഷൻ സെന്ററിൽ വച്ച് നടന്ന മെഗാ ജോബ് ഫെസ്റ്റിൽ കഴക്കൂട്ടം വാർഡ് കൗൺസിലർ കവിത. എൽ. എസ് അധ്യക്ഷത വഹിച്ചു. കിൻഫ്ര ഇൻ്റർനാഷണൽ അപ്പാരൽ പാർക്ക് സി. ഇ. ഒ ജീവ ആനന്ദൻ,കേരള സ്റ്റാർട്ട് അപ് മിഷൻ സി.ഇ. ഒ അനൂപ്.പി. അംബിക, അസാപ് കേരള മേധാവി ഐ. പി ലൈജു, കേരള നോളജ് ഇക്കോണമി മിഷൻ പ്രോഗ്രാംസ് മേധാവി ബിജു സോമൻ, എന്നിവരും ചടങ്ങിൽ സന്നിഹിതരായി.