ഏഷ്യൻ ​ഗെയിംസ്; പുരുഷ കബഡിയിലും ഇന്ത്യയ്ക്ക് സ്വർണം

News Desk

07 October 2023 09:08 PM

ഏഷ്യൻ ​ഗെയിംസ് പുരുഷ കബഡിയിലും ഇന്ത്യയ്ക്ക് സുവർണ തിളക്കം. സ്വർണ മെഡലിനായുള്ള പോരാട്ടത്തിൽ 33-29 എന്ന പോയിന്റിന് ഇറാനെ തോൽപ്പിച്ചാണ് ഇന്ത്യ കബഡിയുടെ രാജാക്കന്മാരായത്. മത്സരത്തിൽ വ്യക്തമായ മുൻ തൂക്കത്തോടെയാണ് ഇന്ത്യൻ ടീം മുന്നോട്ടുപോയത്. ആദ്യ പകുതി അവസാനിക്കുമ്പോൾ ഇന്ത്യ 17-13ന് മുന്നിലെത്തിയിരുന്നു. രണ്ടാം പകുതിയിൽ ഇറാൻ ശക്തമായ പോരാട്ടം കാഴ്ച വെച്ചതോടെ സ്കോർ 25-25ന് തുല്യമായി. എങ്കിലും നാല് പോയിന്റിന്റെ ലീഡിൽ ഇന്ത്യ മത്സരം ജയിച്ചു.

വനിതകളുടെ കബഡിയിലും ഇന്ത്യ സുവർണ നേട്ടം ആഘോഷിച്ചിരുന്നു. ഏഷ്യൻ ​ഗെയിംസിൽ ഇന്ത്യയുടെ മെഡൽ നേട്ടം 105ലേക്ക് എത്തി. 28 സ്വർണവും 36 വെള്ളിയും 41 വെങ്കലവും ഇന്ത്യൻ താരങ്ങൾ ഇതിനോടകം നേടി. ചരിത്രത്തിൽ ആദ്യമായാണ് ഇന്ത്യ 100ലധികം മെഡലുകൾ നേടുന്നത്.