ടൊവിനോയുടെ നായികയായി തൃഷ; 'ഐഡന്റിറ്റി' സെപ്തംബറിൽ തുടങ്ങും

News Desk

05 July 2023 10:45 AM

'ഫോറൻസിക്കി'ന്റെ വിജയത്തിനുശേഷം സംവിധായകൻ അഖിൽ പോൾ - അനസ്‌ഖാൻ, നിർമ്മാതാവ് രാജു മല്യത്ത് ടൊവിനോ തോമസ് എന്നിവർ ഒരുമിക്കുന്ന 'ഐഡന്റിറ്റി' എന്ന ചിത്രത്തിന്റെ പുതിയ വിശേഷങ്ങളാണ് ഇപ്പോൾ പുറത്തുവരുന്നത്. ചിത്രത്തിൽ തെന്നിന്ത്യൻ സൂപ്പർ താരം തൃഷ കൂടി പങ്കാളിയാകുമെന്നാണ് പുറത്തുവരുന്ന റിപ്പോർട്ട്. സെപ്തംബറിലാണ് സിനിമയുടെ ചിത്രീകരണം ആരംഭിക്കുക. എറണാകുളം, ബംഗളൂരു, മൗറീഷ്യസ് എന്നിവിടങ്ങളാണ് പ്രധാന ലൊക്കേഷൻ.

മഡോണ സെബാസ്റ്റ്യനാണ് ചിത്രത്തിൽ മറ്റൊരു പ്രധാന കഥാപാത്രമായെത്തുന്നത്. ആക്‌ഷൻ ത്രില്ലർ വിഭാഗത്തിൽ ബിഗ് ബഡ്‌ജറ്റിൽ ഒരുങ്ങുന്ന ചിത്രത്തിൽ വൻ താരനിര അണിനിരക്കുന്നു. രാഗം മൂവീസിന്റെ ബാനറിൽ രാജു മല്യത്ത് സെഞ്ച്വറി കൊച്ചുമോനുമായി ചേർന്നാണ് ചിത്രത്തിന്റെ നിർമ്മാണം.

2018-ൽ ശ്യാമപ്രസാദിന്റെ 'ഹേ ജൂഡ്' എന്ന ചിത്രത്തിലൂടെ നിവിൻ പോളിയ്‌ക്കൊപ്പമാണ് തൃഷ മലയാളത്തിൽ അരങ്ങേറ്റം കുറിക്കുന്നത്. മോഹൻലാലിന്റെ 'റാം' എന്ന ത്രില്ലർ ചിത്രത്തിലും തൃഷ അഭിനയിക്കുന്നുണ്ട്. ദൃശ്യം 2ന്റെ വൻ വിജയത്തിന് ശേഷം സംവിധായകൻ ജീത്തു ജോസഫുമായി നടൻ വീണ്ടും ഒന്നിക്കുന്ന ചിത്രമാണ് റാം. വിവിധ സിനിമാ മേഖലയിൽ നിന്നുള്ള അഭിനേതാക്കളെ മലയാളത്തിൽ കാസ്റ്റ് ചെയ്യുന്നതിലൂടെ റിലീസിന് മുമ്പുതന്നെ ഇന്ത്യയിലുടനീളം ഹൈപ്പ് സൃഷ്ടിക്കാൻ അണിയറപ്രവർത്തകർക്ക് കഴിഞ്ഞിട്ടുണ്ട്.