കെകെ ശൈലജയെ ഒഴിവാക്കാന്‍ കാരണം; മറുപടിയുമായി മുഖ്യമന്ത്രി

News Desk

19 May 2021 08:38 PM

തിരുവനന്തപുരം: പുതിയ മന്ത്രിസഭയില്‍ നിന്ന് ആരോഗ്യമന്ത്രി കെകെ ശൈലജയെ ഒഴിവാക്കിയതുമായി ബന്ധപ്പെട്ട വിമര്‍ശനങ്ങളില്‍ മറുപടിയുമായി മുഖ്യമന്ത്രി പിണറായി വിജയന്‍. കെകെ ശൈലജയെ ഒഴിവാക്കിയതിന് പിന്നില്‍ ഒരു ദുരുദ്ദേശമില്ലെന്നും കൊവിഡ് പ്രതിരോധത്തെ അത് ഒരിക്കലും ബാധിക്കില്ലെന്നും മുഖ്യമന്ത്രി പറഞ്ഞു. വാര്‍ത്താസമ്മേളനത്തില്‍ മാധ്യമപ്രവര്‍ത്തകരുടെ ചോദ്യങ്ങള്‍ക്ക് മറുപടി നല്‍കുകയായിരുന്നു അദ്ദേഹം.

കെകെ ശൈലജക്ക് പുറമെ മന്ത്രിസഭയില്‍ മികച്ച പ്രകടനം കാഴ്ച വച്ച ഒട്ടേറെ പേരുണ്ടെയിരുന്നെന്നും അവര്‍ക്കും വീണ്ടും മന്ത്രിസ്ഥാനം നല്‍കിയിട്ടില്ലെന്നും മുഖ്യമന്ത്രി പറഞ്ഞു.

പുതുമുഖങ്ങള്‍ക്ക് പ്രാധാന്യം നല്‍കിയ മന്ത്രിസഭയില്‍ മുഖ്യമന്ത്രി മാറാത്തതിന് കാരണം പാര്‍ട്ടി അങ്ങനെ തീരുമാനിച്ചതാണെന്ന് മുഖ്യമന്ത്രി പറഞ്ഞു. ശൈലജയെ ഒഴിവാക്കിയതിന് പിന്നില്‍ ഒരു ദുരുദ്ദേശവുമില്ലെന്നും അദ്ദേഹം പറഞ്ഞു.

\"പാര്‍ട്ടിയില്‍ ഏതെങ്കിലും ഒരാള്‍ അല്ല ഇത്തരം കാര്യങ്ങള്‍ തീരുമാനിക്കുന്നത്. അത് മറ്റൊരു കണ്ണിലൂടെ കാണുന്നില്ലെങ്കില്‍ സ്വാഗതം ചെയ്യപ്പെടുന്ന കാര്യമാണ്. എല്ലാ പ്രവര്‍ത്തനങ്ങളും കൂട്ടായിട്ടാണ് നടക്കുന്നത്. കൂട്ടായ പ്രവര്‍ത്തനത്തില്‍ ഒരു കുറവും ഉണ്ടാവില്ല. നല്ല മികവോട് കൂടി തുടര്‍ന്ന് പ്രവര്‍ത്തനങ്ങള്‍ നടത്താനാവും എന്ന് തന്നെയാണ് കാണേണ്ടത്,\" മുഖ്യമന്ത്രി പറഞ്ഞു.

കെകെ ശൈലജയെ ഒഴിവാക്കിയതില്‍ പിബിയും പാര്‍ട്ടി കേന്ദ്ര നേതൃത്വവും അതൃപ്തി പ്രകടിപ്പിച്ചു എന്ന തരത്തിലുള്ള വാര്‍ത്തകളില്‍ ഒരു വാസ്തവവുമില്ലെന്നും മാധ്യമപ്രവര്‍ത്തനങ്ങളുടെ ചോദ്യങ്ങള്‍ക്ക് മറുപടിയായി മുഖ്യമന്ത്രി പറഞ്ഞു.

പുതിയ ആളുകള്‍ നേതൃനിരയിലേക്ക് വരട്ടെ എന്നതാണ് നയമെന്നും മുഖ്യമന്ത്രി പറഞ്ഞു.

\"മന്ത്രിസഭയിലെ എല്ലാവരും മികവ് പുലര്‍ത്തിയവരാണ്. വിമര്‍ശനങ്ങളെ നല്ല രീതിയില്‍ കാണുന്നു,\" മുഖ്യമന്ത്രി പറഞ്ഞു.