പോസ്റ്റ്‌മോര്‍ട്ടത്തില്‍ കൈയ്യിലെ സിറിഞ്ചിന്റെ പാട് സംശയമായി, ഭാര്യയെയും മക്കളെയും വിഷം കുത്തിവച്ച്‌ കൊലപ്പെടുത്തിയ യുവാവ് അറസ്റ്റില്‍
കുണ്ടറ: കേരളപുരത്ത് ഭാര്യയ്ക്കും മക്കള്‍ക്കും വിഷം കുത്തിവച്ച ശേഷം ആത്മഹത്യയ്ക്ക് ശ്രമിച്ച ഗൃഹനാഥനെ പൊലീസ് അറസ്റ്റ് ചെയ്തു. ഗുരുതരാവസ്ഥയില്‍ കൊല്ലത്തെ സ്വകാര്യ ആശുപത്രിയില്‍ ചികിത്സയിലായിരുന്ന മണ്‍റോത്തുരുത്ത് പെരുങ്ങാലെ എയ്രോപ്പില്‍ വീട്ടില്‍ അജി എന്നുവിളിക്കുന്ന എഡ്വേര്‍ഡിനെയാണ് (41) ഡിസ്ചാര്‍ജ് ചെയ്തയുടന്‍ കുണ്ടറ പൊലീസ് അറസ്റ്റ് ചെയ്തത്.
ഗുരുതരാവസ്ഥയില്‍ കാണപ്പെട്ട എഡ്വേര്‍ഡിന്റെ ഭാര്യ വര്‍ഷ (26) ആശുപത്രിയില്‍ വച്ചും ഇളയ മക്കളായ അലന്‍ (5), ആരവ് (3 മാസം) എന്നിവര്‍ ആശുപത്രിയിലേക്ക് കൊണ്ടുപോകുന്ന വഴിക്കും മരിച്ചിരുന്നു. അന്വേഷണത്തില്‍ കൊലപാതകമാണെന്ന് തെളിഞ്ഞതിനെ തുടര്‍ന്നാണ് പൊലീസ് എഡ്വേര്‍ഡിനെ അറസ്റ്റ് ചെയ്തത്.
കഴിഞ്ഞ 11ന് കുടുബം വാടകയ്ക്ക് താമസിച്ചിരുന്ന കേരളപുരം പൂജപ്പുര ക്ഷേത്രത്തിന് സമീപം വരട്ടുചിറയില്‍ സ്വാതിയില്‍ വച്ചായിരുന്നു സംഭവം. എഡ്വേര്‍ഡുമായി പിണങ്ങി മാതാപിതാക്കള്‍ക്കൊപ്പം കഴിഞ്ഞിരുന്ന വര്‍ഷയെ പ്രതി സ്‌നേഹം നടിച്ച്‌ വിളിച്ചുകൊണ്ട് വരികയായിരുന്നു. ഭാര്യയ്ക്ക് പരപുരുഷ ബന്ധമുണ്ടെന്ന് ആരോപിച്ച്‌ അന്നേദിവസം ഉച്ചകഴിഞ്ഞ് വഴക്കിട്ട എഡ്വേര്‍ഡ് വീടിന്റെ മുന്‍വശത്ത് നില്‍ക്കുകയായിരുന്ന വര്‍ഷയെ പിടിച്ചുതള്ളി.
സ്റ്റെപ്പില്‍ തലയടിച്ച്‌ വീണ് ബോധം നഷ്ടപ്പെട്ട വര്‍ഷയെ പ്രതി ബെഡ് റൂമില്‍ എത്തിച്ചു. തുടര്‍ന്ന് മെഡിക്കല്‍ സ്റ്റോര്‍ ജീവനക്കാരന്‍ കൂടിയായ പ്രതി വിഷം കുത്തിവച്ച്‌ വര്‍ഷയെയും ഇളയെ രണ്ട് മക്കളെയും കൊലപ്പെടുത്തുകയായിരുന്നു. പോസ്റ്റ്‌മോര്‍ട്ടത്തില്‍ കൈയില്‍ സിറിഞ്ചിന്റെ പാടും വിഷം കുത്തിവച്ചതായും കണ്ടെത്തിയതോടെയാണ് കൊലപാതകമാണെന്ന് മനസിലായത്. പിതാവ് കുടിക്കാന്‍ പാനീയം നല്‍കിയെങ്കിലും കയ്പ്പുള്ളതിനാല്‍ തുപ്പിക്കളഞ്ഞതായി ഇവരുടെ മൂത്തകുട്ടി പൊലീസിന് മൊഴി നല്‍കിയിരുന്നു.