ലഹരി വിരുദ്ധ സംഘടനയുടെ സംസ്ഥാന പ്രസിഡന്റ് MDMA കേസിൽ പിടിയിൽ

നാട്ടിൽ ലഹരിവിരുദ്ധ പ്രവർത്തനങ്ങൾക്ക് മുന്നിൽ നിൽക്കുകയും ലഹരിവിരുദ്ധ സംഘടനയുടെ സംസ്ഥാന നേതാവാണെന്ന് അവകാശപ്പെടുകയും ചെയ്ത യുവാവ് എംഡിഎംഎയുമായി (MDMA) പോലീസ് പിടിയിലായി. 'ആന്റി ഡ്രഗ്സ് മൂവ്മെന്റ് ഇൻ നേഷൻ' (Anti Drugs Movement in Nation) എന്ന സംഘടനയുടെ യൂത്ത് വിംഗ് സംസ്ഥാന പ്രസിഡന്റായ എഴുമറ്റൂർ സ്വദേശി ഷർഫിൻ സെബാസ്റ്റ്യനാണ് പത്തനംതിട്ടയിൽ അറസ്റ്റിലായത്. സംസ്ഥാനവ്യാപകമായി പോലീസ് നടത്തുന്ന 'ഓപ്പറേഷൻ തൂഫാൻ' (Operation Toofan) എന്ന പ്രത്യേക ലഹരിവിരുദ്ധ പരിശോധനയുടെ ഭാഗമായാണ് പ്രതിയെ കുടുക്കിയത്.

പത്തനംതിട്ട ജില്ലാ പോലീസ് മേധാവിക്ക് ലഭിച്ച രഹസ്യ വിവരത്തിന്റെ അടിസ്ഥാനത്തിൽ പെരുമ്പെട്ടി പോലീസും ജില്ലാ ലഹരിവിരുദ്ധ സ്ക്വാഡായ ഡാൻസാഫും (DANSAF) സംയുക്തമായാണ് പരിശോധന നടത്തിയത്. കഴിഞ്ഞ രണ്ടുദിവസമായി പോലീസ് ഇയാളെ കൃത്യമായി നിരീക്ഷിച്ചു വരികയായിരുന്നു.

ഞായറാഴ്ച ഉച്ചയോടെ പോലീസ് സംഘം ഷർഫിന്റെ എഴുമറ്റൂരിലെ വീട്ടിൽ റെയ്ഡിനായി എത്തി. ഈ സമയം പോലീസിനെ കബളിപ്പിക്കാനായി തന്റെ യഥാർത്ഥ കിടപ്പുമുറി കാണിച്ചു കൊടുക്കാതെ, മറ്റൊരു മുറി കാണിച്ച് ഇയാൾ ഉദ്യോഗസ്ഥരെ തെറ്റിദ്ധരിപ്പിക്കാൻ ശ്രമിച്ചു. എന്നാൽ സംശയം തോന്നിയ പോലീസ് സംഘം വീടിന്റെ മുക്കും മൂലയും അരിച്ചുപെറുക്കി പരിശോധിച്ചപ്പോഴാണ് പുസ്തകങ്ങൾക്കിടയിൽ അതീവ രഹസ്യമായി ഒളിപ്പിച്ച നിലയിൽ എംഡിഎംഎ കണ്ടെത്തിയത്.