ബാലഗോകുലം സമ്മേളനത്തിൽ പങ്കെടുത്ത് എംജി സർവ്വകലാശാല വിസി; വീണ്ടും വിവാദം

ആർഎസ്എസ് (RSS) നിയന്ത്രണത്തിലുള്ള കുട്ടികളുടെ സംഘടനയായ ബാലഗോകുലത്തിന്റെ പൊതുസമ്മേളനത്തിൽ എംജി സർവ്വകലാശാല വൈസ് ചാൻസലർ (VC) ഡോ. ഡി. മാവൂത്ത് ഉദ്ഘാടകനായി പങ്കെടുത്തത് പുതിയ വിവാദത്തിന് വഴിതുറക്കുന്നു. ആലപ്പുഴ മാവേലിക്കരയിൽ ഇന്നലെ നടന്ന ബാലഗോകുലം ദക്ഷിണകേരള വാർഷിക സമ്മേളനത്തിന്റെ പൊതുസഭയിലാണ് വിസി പങ്കെടുത്തത്. ഉദ്ഘാടന പ്രസംഗത്തിൽ ബാലഗോകുലത്തിന്റെ പ്രവർത്തനങ്ങളെ അദ്ദേഹം വാനോളം പ്രശംസിക്കുകയും ചെയ്തു. സനാതന ധർമ്മം കുട്ടികളുടെ ജീവിതത്തിൽ പകർന്നു നൽകുന്നതിൽ ബാലഗോകുലം നിർണ്ണായക പങ്കുവഹിക്കുന്നുണ്ടെന്നാണ് ഡോ. ഡി. മാവൂത്ത് പറഞ്ഞത്.

നേരത്തെ, ആർഎസ്എസ് ശതാബ്ദിയോട് അനുബന്ധിച്ച് തിരുവനന്തപുരത്ത് നടന്ന ചടങ്ങിൽ ആർഎസ്എസ് മേധാവി മോഹൻ ഭാഗവതിനൊപ്പം ഡോ. ഡി. മാവൂത്ത് അടക്കമുള്ള വിസിമാർ വേദി പങ്കിട്ടത് വലിയ രാഷ്ട്രീയ വിവാദങ്ങൾക്ക് കാരണമായിരുന്നു. ഇതിന് തൊട്ടുപിന്നാലെയാണ് അദ്ദേഹം വീണ്ടും സംഘപരിവാർ സംഘടനയുടെ ചടങ്ങിൽ എത്തിയിരിക്കുന്നത്.

സംഘപരിവാർ പശ്ചാത്തലമുള്ള ഡോ. ഡി. മാവൂതിനെ എംജി സർവ്വകലാശാല വിസിയായി നിയമിച്ചതു മുതൽ വ്യാപകമായ ആക്ഷേപങ്ങൾ ഉയർന്നിരുന്നു. ഇതിന് പുറമെ, സർവ്വകലാശാലയിലെ വിവിധ വകുപ്പ് മേധാവികളായി ആർഎസ്എസ് അനുകൂലികളെ വിസി പരസ്യമായി നിയമിക്കുന്നു എന്ന ഗുരുതരമായ ആരോപണവും നിലവിൽ ക്യാമ്പസിനുള്ളിൽ ശക്തമാണ്. ആ സാഹചര്യത്തിൽ വിസിയുടെ പുതിയ സന്ദർശനം വരും ദിവസങ്ങളിൽ കൂടുതൽ പ്രതിഷേധങ്ങൾക്ക് കാരണമായേക്കും.