ഒന്നര വയസുകാരന് അനസ്തേഷ്യ നൽകിയതിൽ വീഴ്ച പറ്റിയ സംഭവം; ഡോക്ടർക്കെതിരെ കേസെടുത്ത് പൊലീസ്

കണ്ണൂരിൽ മുഖത്ത് പരുക്കേറ്റ് ചികിത്സയ്‌ക്കെത്തിയ ഒന്നര വയസ്സുകാരന് അനസ്തേഷ്യ നൽകിയതിൽ വീഴ്ച വരുത്തിയ ഡോക്ടർക്കെതിരെ പോലീസ് കേസെടുത്തു. പയ്യന്നൂർ ബേബി മെമ്മോറിയൽ ആശുപത്രിയിലെ അനസ്തേഷ്യോളജിസ്റ്റ് ഡോ. അഞ്ജലി പൊതുവാളിനെതിരെയാണ് പയ്യന്നൂർ പോലീസ് കേസ് രജിസ്റ്റർ ചെയ്തത്. ഡോക്ടറുടെ അശ്രദ്ധ കാരണം കുട്ടിക്ക് തലച്ചോറിന് തകരാർ സംഭവിച്ചെന്നാണ് പ്രഥമ വിവര റിപ്പോർട്ടിൽ വ്യക്തമാക്കുന്നത്.

കളിക്കുന്നതിനിടെ വീണ് മുഖത്ത് പരുക്കേറ്റ എരമം സ്വദേശികളായ ദമ്പതികളുടെ കുഞ്ഞിനെ മുറിവിൽ സ്റ്റിച്ച് ഇടുന്നതിനായാണ് പയ്യന്നൂരിലെ ആശുപത്രിയിൽ പ്രവേശിപ്പിച്ചത്. എന്നാൽ അനസ്തേഷ്യ നൽകിയതിന് തൊട്ടുപിന്നാലെ കുഞ്ഞിന്റെ ബോധം നഷ്ടപ്പെടുകയും തുടർന്ന് കണ്ണൂരിലെ ആശുപത്രിയിലേക്ക് മാറ്റുകയുമായിരുന്നു. അനസ്തേഷ്യ നൽകിയപ്പോൾ കുട്ടിക്ക് ഹൃദയസ്തംഭനം ഉണ്ടായെന്നാണ് ആശുപത്രി അധികൃതരുടെ വിശദീകരണം. അതീവ അടിയന്തിര ഘട്ടങ്ങളിൽ അല്ലാതെ രണ്ട് വയസ്സിൽ താഴെയുള്ള കുട്ടികൾക്ക് അനസ്തേഷ്യ നൽകാറില്ലെന്ന് വിദഗ്ധർ ചൂണ്ടിക്കാണിച്ചതോടെയാണ് ബന്ധുക്കൾ ചികിത്സാപ്പിഴവ് ആരോപിച്ച് പോലീസിൽ പരാതി നൽകിയത്.