സ്വര്ണവില വീണ്ടും ഇടിഞ്ഞു; ഇന്ന് വിലയില് നേരിയ കുറവ്
കഴിഞ്ഞ ദിവസങ്ങളിൽ കുതിച്ചുയർന്ന സംസ്ഥാനത്തെ സ്വർണ്ണവിലയിൽ ഇന്ന് നേരിയ കുറവ് രേഖപ്പെടുത്തി. 22 കാരറ്റ് സ്വർണ്ണം പവന് 200 രൂപയുടെ ഇടിവാണ് ഇന്ന് ഉണ്ടായിരിക്കുന്നത്. ഇതോടെ ഒരു പവൻ സ്വർണ്ണത്തിന്റെ ഇന്നത്തെ വില 1,11,000 രൂപയായി. ഗ്രാമിന് 25 രൂപ വീതം കുറഞ്ഞതോടെ ഒരു ഗ്രാം സ്വർണ്ണത്തിന്റെ വില 13,850 രൂപയിലെത്തി.
അന്താരാഷ്ട്ര വിപണിയിലുണ്ടായ അനുകൂല ചലനങ്ങളാണ് ആഭ്യന്തര വിപണിയിലും സ്വർണ്ണവില കുറയാൻ കാരണമായത്. ഇറാൻ-അമേരിക്ക സമാധാന കരാർ തയ്യാറായത് ഉൾപ്പെടെയുള്ള ആഗോള രാഷ്ട്രീയ മാറ്റങ്ങൾ വിപണിയെ സ്വാധീനിച്ചിട്ടുണ്ട്. കഴിഞ്ഞ ശനിയാഴ്ച ഒറ്റയടിക്ക് 2,160 രൂപ വർദ്ധിച്ച സ്വർണ്ണവില പിന്നീട് തുടർച്ചയായ ദിവസങ്ങളിൽ കുതിച്ചുയരുന്ന കാഴ്ചയാണ് കണ്ടത്. മൂന്ന് ദിവസം കൊണ്ട് മാത്രം പവന് 4,300 രൂപയുടെ റെക്കോർഡ് വർദ്ധനവാണ് വിപണിയിലുണ്ടായത്. ജനുവരി 29-ന് രേഖപ്പെടുത്തിയ 1,13,160 രൂപയാണ് സംസ്ഥാനത്തെ ചരിത്രത്തിലെ ഏറ്റവും ഉയർന്ന സ്വർണ്ണവില.
അതേസമയം, സംസ്ഥാനത്തെ വെള്ളിവിലയിൽ ഇന്ന് മാറ്റമൊന്നും രേഖപ്പെടുത്തിയിട്ടില്ല. വെള്ളി ഗ്രാമിന് 265 രൂപ എന്ന നിരക്കിലാണ് ഇന്ന് വ്യാപാരം നടക്കുന്നത്. 10 ഗ്രാം വെള്ളിക്ക് 2,650 രൂപയാണ് ഇന്നത്തെ വിപണി വില.
