‘‘വീര്യം കുറഞ്ഞ മദ്യം അപകടം’: ഋഷിരാജ് സിംഗ് 2018ൽ നികുതി സെക്രട്ടറിക്ക് അയച്ച കത്ത് പുറത്ത്

വീര്യം കുറഞ്ഞ മദ്യത്തിന്റെ (ബക്കാർഡി ബ്രീസർ) നികുതി കുറയ്ക്കാനുള്ള ബജറ്റ് പ്രഖ്യാപനം വൻ രാഷ്ട്രീയ വിവാദമായിരിക്കെ, 2017-18 കാലഘട്ടത്തിൽ ഈ മദ്യത്തിന്റെ വിൽപ്പനയ്‌ക്കെതിരെ അന്നത്തെ എക്സൈസ് കമ്മീഷണർ ഋഷിരാജ് സിംഗ് എടുത്ത ശക്തമായ നിലപാടുകളും കത്തും പുറത്ത്. വീര്യം കുറഞ്ഞ മദ്യത്തിന്റെ വിപണന നീക്കങ്ങൾക്ക് തടസ്സമായി നിന്നത് ഋഷിരാജ് സിംഗിന്റെ കർശന നിലപാടായിരുന്നുവെന്ന് വ്യക്തമാക്കുന്നതാണ് ഇപ്പോൾ പുറത്തുവന്ന രേഖകൾ. 2018-ൽ അദ്ദേഹം നികുതി വകുപ്പ് സെക്രട്ടറി ആശാ തോമസിന് അയച്ച കത്തിലാണ് ഈ മുന്നറിയിപ്പുകളുള്ളത്.

വീര്യം കുറഞ്ഞ മദ്യമാണെങ്കിലും അത് വലിയ ദൂരവ്യാപക പ്രത്യാഘാതങ്ങൾ ഉണ്ടാക്കുമെന്നും, സ്കൂൾ കുട്ടികൾ ഉൾപ്പെടെയുള്ളവർ ഇത് വെറുമൊരു ശീതളപാനീയം (Soft Drink) പോലെ വാങ്ങി ഉപയോഗിക്കാൻ സാധ്യതയുണ്ടെന്നും ഋഷിരാജ് സിംഗ് കത്തിൽ ചൂണ്ടിക്കാട്ടിയിരുന്നു. കുട്ടികളെയും യുവാക്കളെയും വീര്യം കൂടിയ മദ്യപാനത്തിലേക്ക് നയിക്കാനുള്ള ആദ്യ ചവിട്ടുപടിയായി ഈ നയം മാറുമെന്നും അദ്ദേഹം കത്തിലൂടെ സർക്കാരിന് കടുത്ത മുന്നറിയിപ്പ് നൽകിയിരുന്നു.