നീന്തൽ പാഠ്യപദ്ധതിയിൽ ഈ വർഷം; വിദ്യാഭ്യാസ മന്ത്രി
തൃശ്ശൂർ: കേരളത്തിന്റെ അക്കാദമിക് മികവ് അന്താരാഷ്ട്ര നിലവാരത്തിൽ എത്തണമെന്നതാണ് വിദ്യാഭ്യാസ വകുപ്പിന്റെ ലക്ഷ്യമെന്ന് മന്ത്രി സി രവീന്ദ്രനാഥ്. തൃശ്ശൂരിൽ സംസ്ഥാനതല പ്രവേശനോത്സവത്തിൽ അധ്യക്ഷപ്രസംഗം നടത്തുകയായിരുന്നു അദ്ദേഹം. കേരളത്തിലെ എല്ലാവരുടെയും സഹകരണത്തോടെ ഇത് സാധ്യമാകുമെന്ന് അദ്ദേഹം പറഞ്ഞു.
മുഖ്യമന്ത്രിയുടെ നിർദ്ദേശപ്രകാരം ഈ വർഷംതന്നെ നീന്തൽ പാഠ്യപദ്ധതിയിൽ ഉൾപ്പെടുത്തും. ഓരോ നിയമസഭാ മണ്ഡലത്തിലും 1 സ്വിമ്മിങ് പൂളെങ്കിലും നിർമ്മിക്കും. 1 മുതൽ 12 വരെ ക്ലാസ്സുകൾ ഒരുമിച്ച് തുടങ്ങാൻ കഴിഞ്ഞത് വലിയ നേട്ടമാണ്. സംസ്ഥാന സർക്കാരിന്റെ ദീർഘവീക്ഷണവും മുഖ്യമന്ത്രിയുടെ ശ്രദ്ധയുമാണ് ഇവിടെ എത്താൻ കഴിഞ്ഞത്. ഇതുവരെ പൊതുവിദ്യാഭ്യാസത്തിന് നൽകിയ പിന്തുണ എല്ലാവരുടേയും ഭാഗത്ത് നിന്നും ഉണ്ടാകണമെന്നും മന്ത്രി പറഞ്ഞു.