നീരവ് മോദിയുടെയും മെഹ്സുല് ചോക്സിയുടെയും 2,340 കിലോ ആഭരണ ശേഖരം ഇന്ത്യയിലെത്തിച്ചു
ന്യൂഡല്ഹി: പഞ്ചാബ് നാഷണല് ബാങ്ക് തട്ടിപ്പ് കേസിലെ പ്രതികളായ മെഹ്സുല് ചോക്സിയുടെയും നീരവ് മോദിയുടെയും വന് ആഭരണ ശേഖരം ഇന്ത്യയിലേക്ക് തിരികെ എത്തിച്ചതായി എന്ഫോഴ്സ്മെന്റ് ഡയറക്ടറേറ്റ്. വജ്രങ്ങളും രത്നങ്ങളും അടക്കം 2,340 കിലോ ആഭരണശേഖരം ഹോങ്കോംങ്ങില് നിന്നുമാണ് ഇന്ത്യയിലേക്ക് കൊണ്ടുവന്നത്. ഈ ആഭരണങ്ങള്ക്ക് 1,350 കോടി രൂപ വിലമതിക്കും.
ഹോങ്കോംങ്ങില് ഒരു കമ്പനിയുടെ ഗോഡൗണിലാണ് ആഭരണ ശേഖരം സൂക്ഷിച്ചിരുന്നത്. കള്ളപ്പണം വെളുപ്പിക്കല് നിരോധന നിയമപ്രകാരമാണ് ഇവരുടെ സ്വത്തുക്കള് പിടിച്ചെടുത്തതെന്ന് അധികൃതര് വ്യക്തമാക്കി. നേരത്തെ ഇവരുടെ 137 കോടി രൂപ വിലമതിക്കുന്ന വസ്തുവകകള് ദുബായില് നിന്നും പിടിച്ചെടുത്ത് ഇന്ത്യയില് എത്തിച്ചിരുന്നു.