ശിവശങ്കറെ കസ്റ്റംസ് വീണ്ടും ചോദ്യംചെയ്തു വിട്ടയച്ചു
കൊച്ചി: സ്വര്ണക്കടത്ത് കേസുമായി ബന്ധപ്പെട്ടു മുഖ്യമന്ത്രിയുടെ മുന് പ്രിന്സിപ്പല് സെക്രട്ടറി എം. ശിവശങ്കറെ കസ്റ്റംസ് വീണ്ടും ചോദ്യംചെയ്തു വിട്ടയച്ചു. മൂന്നാം തവണ നടന്ന ചോദ്യം ചെയ്യല് പതിനൊന്നു മണിക്കൂര് നീണ്ടു. രാവിലെ 11ന് ആരംഭിച്ച മാരത്തണ് ചോദ്യം ചെയ്യല് രാത്രി പത്തോടെയാണ് അവസാനിച്ചത്. നേരത്തെ രണ്ടുതവണയായി 17 മണിക്കൂര് ശിവശങ്കറെ കസ്റ്റംസ് ചോദ്യംചെയ്തിരുന്നു.
കൊച്ചിയിലെ കസ്റ്റംസ് പ്രിവന്റീവ് കമ്മീഷണറുടെ ഓഫീസില് കമ്മീഷണര് സുമിത് കുമാറും സംഘവുമാണ് ശിവശങ്കറെ ചോദ്യംചെയ്തത്. ക്ളീന്ചിറ്റ് നല്കാതെയാണു മൂന്നാമതും ശിവശങ്കറെ വിട്ടയച്ചിരിക്കുന്നത്. മൊഴികളില് വ്യക്തത വരുത്തിയശേഷം വീണ്ടും ചോദ്യംചെയ്യും. യുഎഇ കോണ്സുലേറ്റിലൂടെയെത്തിയ ഈന്തപ്പഴം സംസ്ഥാനത്തെ അനാഥാലയങ്ങളിലും സ്പെഷല് സ്കൂളുകളിലും നല്കാന് സാമൂഹികനീതി വകുപ്പ് വഴി ശിവശങ്കര് നടത്തിയ ഇടപെടലിനെക്കുറിച്ചു ഡയറക്ടറായിരുന്ന ടി.വി. അനുപമയുടെ മൊഴിയുടെ അടിസ്ഥാനത്തിലാണു ചോദ്യം ചെയ്തത്.
സ്വപ്നയും ശിവശങ്കറും ഒരുമിച്ചു നടത്തിയ വിദേശയാത്രകളെക്കുറിച്ചും ഇവര് കൊണ്ടുപോയ ബാഗേജുകളെക്കുറിച്ചും ശിവശങ്കറിനുനേരെ ചോദ്യമുയര്ന്നു.