ഭക്ഷ്യസുരക്ഷ ഉറപ്പാക്കുന്നതിന് സംസ്ഥാന സര്ക്കാര് പ്രതിജ്ഞാബദ്ധം: മന്ത്രി കെ.കെ. ശൈലജ ടീച്ചര്
തിരുവനന്തപുരം: ജനങ്ങളുടെ പൊതുജനാരോഗ്യം ഉറപ്പുവരുത്തുന്നതിന് മികച്ച അടിസ്ഥാന സൗകര്യങ്ങള് ഒരുക്കുന്നതോടൊപ്പം ഭക്ഷ്യസുരക്ഷയും ഉറപ്പാക്കുന്നതിനുള്ള ഊര്ജിത ശ്രമങ്ങള് സര്ക്കാര് നടപ്പിലാക്കി വരുന്നതായി ഭക്ഷ്യസുരക്ഷയുടെ ചുമതലയുള്ള ആരോഗ്യ വകുപ്പ് മന്ത്രി കെ.കെ. ശൈലജ ടീച്ചര്. സംസ്ഥാന ഭക്ഷ്യസുരക്ഷാ വാരാചരണം സംസ്ഥാനതല ഉദ്ഘാടനത്തിന്റെ ഭാഗമായി സംഘടിപ്പിച്ച സൈക്കിള് സന്ദേശ റാലി ഫ്ളാഗോഫ് ചെയ്തു സംസാരിക്കുകയായിരുന്നു മന്ത്രി.
ഭക്ഷ്യസുരക്ഷ പൗരന്റെ കടമയാണെന്നുള്ള ഈ വര്ഷത്തെ ഐക്യരാഷ്ട്ര സഭയുടെ സന്ദേശം തികച്ചും അര്ത്ഥവത്താണെന്ന് മന്ത്രി പറഞ്ഞു. പൊതുജനങ്ങളും വ്യാപാരികളും സന്നദ്ധ സംഘടനകളും പൊതുപ്രവര്ത്തകരും മാധ്യമ സുഹൃത്തുക്കളും ഒന്നിച്ച് ഈ രംഗത്ത് പ്രവര്ത്തിക്കേണ്ടതുണ്ട്. മറ്റേതു സംസ്ഥാനത്തെക്കാളും ഭക്ഷ്യസുരക്ഷാ വകുപ്പിന്റെ പ്രവര്ത്തനം കേരളത്തില് കുറ്റമറ്റതാണ്. പുതുതായി 90 ലധികം ഭക്ഷ്യസുരക്ഷാ ഓഫീസര്മാര്ക്ക് പരിശീലനം നല്കി നിയമിച്ചുകഴിഞ്ഞു. ഭക്ഷ്യസുരക്ഷാ ലാബുകള് അന്താരാഷ്ട്ര നിലവാരത്തിലേക്ക് ഉയര്ത്തി എന്.എ.ബി.എല്. അംഗീകാരം നേടിയിട്ടുണ്ട്. ഇനിയും തുടര്നടപടികള് ഉണ്ടാകണമെന്നും മന്ത്രി അറിയിച്ചു.
സംസ്ഥാന ഭക്ഷ്യസുരക്ഷാ കമ്മീഷണര് ഡോ. രത്തല് ഖേല്ക്കര് ഐ.എ.എസ്., ജോയിന്റ് കമ്മീഷണര്മാരായ അനില്കുമാര്, മിനി, ഡെപ്യൂട്ടി ഡയറക്ടര് മോനി, സി.ജി.എ. തങ്കച്ചന്, ഫിനാന്സ് ഓഫീസര് ജയകുമാര്, അഡ്മിനിസ്ട്രേറ്റീവ് ഓഫീസര് സാബു, അസി. ഭക്ഷ്യസുരക്ഷാ കമ്മീഷണര് ദിലീപ് എന്നിവര് പങ്കെടുത്തു.
കവടിയാര് സ്ക്വയറില് നിന്ന് ആരംഭിച്ച് പാളയം യൂണിവേഴ്സിറ്റി കോളേജിന് സമീപം അവസാനിച്ച സൈക്കിള് റാലിയില് കാര്യവട്ടം എല്.എന്.സി.പി.യിലെ സൈക്കിളിസ്റ്റുകളും പരിശീലകരും ഉള്പ്പെടെ അമ്പതോളം പേര് അണിനിരന്നു. ഹോട്ടല് ആന്റ് റസ്റ്റോറന്റ് അസോസിയേഷന്, ബേക്കേഴ്സ് അസോസിയേഷന്, ഭക്ഷ്യ സുരക്ഷാ ജീവനക്കാര് എന്നിവരും പങ്കെടുത്തു.