ചന്ദ്രയാൻ 2 ഭ്രമണപഥ മാറ്റം വിജയകരം
ബെംഗളൂരു: ചന്ദ്രയാൻ 2ന്റെ ഭൂമിക്കു ചുറ്റുമുള്ള ഭ്രമണപഥത്തിൽ നിന്ന് ചന്ദ്രന്റെ ഭ്രമണപഥത്തിലേക്കുള്ള മാറ്റം വിജയകരമായി പൂർത്തിയാക്കി. വിബുധനാഴ്ച പുലർച്ചെയുള്ള ജ്വലനത്തോടെ പേടകം ഭൂമിയുടെ ഭ്രമണപഥം വിട്ട് ദൂരേക്കു കുതിച്ചു. പുലർച്ചെ 3.21 ന് ശേഷം പേടകത്തിലെ ലിക്വിഡ് അപോജി മോട്ടോർ(ലാം ) 1203 സെക്കൻറ് ജ്വലിപ്പിച്ചതിനെ തുടർന്നാണിത്. കഴിഞ്ഞ മാസം 22 ന് ശ്രീഹരിക്കോട്ടയിലെ സതീഷ് ധവാൻ സ്പേയ്സ്സെന്ററിൽ നിന്ന് വിക്ഷേപിച്ച പേടകം 21 ദിവസമായി ഭൂമിയെ വലം വക്കുകയാരുന്നു.
ഓഗസ്റ്റ് 20 ന് ചന്ദ്രന്റെ ഭ്രമണപഥത്തിലേക്ക് ചന്ദ്രയാൻ 2 എത്തുമെന്ന് ഐഎസ്ആർഒ ചെയർമാൻ കെ.ശിവൻ പറഞ്ഞു. തുടർന്ന് പേടകത്തിന്റെ വേഗവും അകലവും പടിപടിയായി കുറച്ച് ഉദ്ദേശം 100 കിലോമീറ്റർ അകലത്തിൽ ചന്ദ്രന്റെ ചുറ്റും പേടകം വലയം വയ്ക്കും. തുടർന്നാണ് മുൻനിശ്ചയപ്രകാരം സെപ്റ്റംബർ ഏഴിന് പേടകത്തിലെ റോവർ ഉൾപ്പെടെയുള്ള ലാൻഡർ മൊഡ്യൂൾ ചന്ദ്രന്റെ ദക്ഷിണധ്രുവത്തിൽ ഇറക്കുക.