വാളയാർ കേസ്: വെറുതെവിട്ട പ്രതികളെ അറസ്റ്റ് ചെയ്യണമെന്ന് ഹൈക്കോടതി
കൊച്ചി: വാളയാർ കേസിൽ പ്രതികളെ അറസ്റ്റ് ചെയ്ത് വിചാരണക്കോടതിയിൽ ഹാജരാക്കാൻ ഹൈക്കോടതി ഉത്തരവിട്ടു. പ്രതികൾക്കായി കോടതി വാറൻറ് പുറപ്പെടുവിച്ചു. ജാമ്യം ലഭിക്കാവുന്ന വാറന്റ് പ്രകാരം വിചാരണക്കോടതി ജാമ്യം അനുവദിക്കണം. സർക്കാർ സമർപ്പിച്ച അപേക്ഷയിലാണ് ഡിവിഷൻ ബഞ്ചിന്റെ ഉത്തരവ്. കോടതി വെറുതെ വിട്ടതിനെ തുടർന്ന് പ്രതികൾ പുറത്ത് വിഹരിക്കുകയാണ്. അപ്പീൽ പരിഗണയിലിരിക്കെ പ്രതികൾ മുങ്ങാനിടയുണ്ടന്ന് കാണിച്ചാണ് സർക്കാർ പ്രത്യേക അപേക്ഷ നൽകിയത്. വിചാരണക്കോടതിക്ക് ഉചിതമായ ജാമ്യ വ്യവസ്ഥകൾ ഏർപ്പെടുത്താം.
പ്രായപൂർത്തിയാവാത്ത പെൺകുട്ടികളെ പീഡിപ്പിച്ച് കൊലപ്പെടുത്തിയ കേസിലെ പ്രതികളെ വെറുതെ വിട്ട വിചാരണക്കോടതിയുടെ ഉത്തരവ് റദ്ദാക്കണമെന്നും പുനരന്വേഷണം വേണമെന്നും ആവശ്യപ്പെട്ട് സർക്കാരും പെൺകുട്ടികളുടെ മാതാവും സമർപ്പിച്ച ഹർജിയാണ് കോടതിയുടെ പരിഗണനയിലുള്ളത്.