കെ.എസ്.ആര്.ടി.സിയും സ്വകാര്യ ബസ് സര്വീസും ഇല്ല, ഹോട്ടലുകളില്ല; ലോക്ക്ഡൗണ് കാലത്തെ നിയന്ത്രണങ്ങളറിയാം?
തിരുവനന്തപുരം: സംസ്ഥാനത്ത് ഇന്ന് 28 പേര്ക്ക് കൂടി കൊറോണ സ്ഥിരീകരിച്ചതോടുകൂടി കേരളം സമ്ബൂര്ണമായി ലോക്ക്ഡൗണ് ചെയ്യാന് സര്ക്കാര് തീരുമാനിച്ചു. ഇന്ന് അര്ദ്ധരാത്രി 12 മുതല് മാര്ച്ച് 31 വരെയാണ് സമ്ബൂര്ണ ലോക്ക് ഡൌണ്. കെ.എസ്.ആര്.ടി.സി, സ്വകാര്യ ബസ് സര്വീസുകള് ഉള്പ്പെടെയുള്ള പൊതുഗതാഗത സംവിധാനങ്ങള് ലോക്ക്ഡൗണ് കാലത്ത് നിറുത്തിവയ്ക്കും.
ലോക്ക്ഡൗണിന്റെ പേരില് പേരില് ജനങ്ങള് പരിഭ്രാന്തരാകരുതെന്നും, അവശ്യസാധനങ്ങള്ക്ക് ക്ഷാമമുണ്ടാകില്ല എന്നും മുഖ്യമന്ത്രി വ്യക്തമാക്കുന്നു. മൂന്ന് മാസത്തേക്കുള്ള ഭക്ഷ്യവസ്തുക്കള് സംസ്ഥാനത്തിന്റെ പക്കല് സ്റ്റോക്കുണ്ടെന്നും, സാധനങ്ങള് വീട്ടിലേക്ക് എത്തിക്കുന്നതുള്പ്പടെ ആലോചിക്കുന്നുണ്ടെന്നും മുഖ്യമന്ത്രി അറിയിച്ചു
സര്ക്കാര് പ്രഖ്യാപിച്ച നിയന്ത്രണങ്ങള് ഇവയാണ്
1. അവശ്യസാധനങ്ങള് വില്ക്കുന്നത് തടയില്ല. മെഡിക്കല് ഷോപ്പുകള് ഒഴികെ ബാക്കി അവശ്യസര്വീസുകളല്ലാത്ത എല്ലാ വ്യാപാരസ്ഥാപനങ്ങളും അടയ്ക്കണം.
2. മെഡിക്കല് ഷോപ്പുകള് ഒഴികെ, അവശ്യസാധനങ്ങള് വില്ക്കുന്ന കടകള്ക്കും പ്രവര്ത്തനസമയം നിശ്ചയിച്ചിട്ടുണ്ട്. രാവിലെ ഏഴ് മണി മുതല് വൈകിട്ട് 5 മണി വരെ മാത്രമേ ഈ കടകള് പ്രവര്ത്തിക്കാവൂ.
3. കാസര്കോട് 11 മണി മുതല് 5 മണി വരെ മാത്രമേ അവശ്യസാധനങ്ങള് വില്ക്കുന്ന കടകള് പ്രവര്ത്തിക്കാവൂ.
4. കെ.എസ്.ആര്.ടി.സി, സ്വകാര്യ ബസ്സുകള് ഓടില്ല. പൊതുഗതാഗതസംവിധാനം പൂര്ണമായി നിര്ത്തി വയ്ക്കുകയാണ്.
5. ആളുകള് വലിയ തോതില് പുറത്തിറങ്ങരുത്. അത് കര്ശനമായി നടപ്പാക്കും. നോക്കാന് പൊലീസുണ്ടാകും.
6. ഓട്ടോ, ടാക്സി സര്വീസുകള് മുടക്കില്ല. പക്ഷേ, ഇവയിലൊന്നും ആളുകളെ കുത്തിക്കയറ്റി കൊണ്ടുപോകാന് പാടില്ല.
7. കാസര്കോട് നിയന്ത്രണം ലംഘിച്ച് ആളുകള് പുറത്തിറങ്ങിയാല് അറസ്റ്റുണ്ടാകും.
8. സാധനങ്ങള് വാങ്ങാന് വ്യാപാരസ്ഥാപനങ്ങളുമായി സഹകരിച്ച്, സ്വിഗ്ഗി, സുമാറ്റോ ഹോം ഡെലിവറി ഭക്ഷണ ആപ്പുകളുടെ മാതൃകയില് ആപ്ലിക്കേഷനോ, പ്രാദേശികമായി വാട്സാപ്പ് ഗ്രൂപ്പുകളോ ഉണ്ടാക്കി എത്തിക്കാന് ഉള്ള സംവിധാനത്തെക്കുറിച്ച് സജീവമായി ആലോചിക്കുന്നു.
9. ഹോട്ടലുകളുണ്ടാകില്ല. ഹോട്ടലുകളില് കൂട്ടം കൂടിയിരുന്ന് ഭക്ഷണം കഴിക്കാന് പാടില്ല. പക്ഷേ, ഹോട്ടലില് നിന്ന് ഫുഡ് ഡെലിവറി ഉണ്ടാകും. ഫുഡ് ഓണ്ലൈന് ഡെലിവറി മുടക്കില്ല. ഹോട്ടലുകളില് നിന്ന് പാര്സലും വാങ്ങാം.
10. കൂടുതല് സര്ക്കാര് ഉദ്യോഗസ്ഥര്ക്ക് വര്ക് ഫ്രം ഹോം ഏര്പ്പെടുത്തും. ഇത്തരമൊരു ഉത്തരവ് പൊതുഗതാഗതമന്ത്രി ഉടന് പുറത്തിറക്കും.
11. ആരാധനാലയങ്ങളില് പോകുന്നതില് കര്ശനമായ വിലക്കുണ്ട്. പക്ഷേ അവിടത്തെ ചടങ്ങുകളും ആചാരങ്ങളും മുടക്കമില്ലാതെ നടത്താം.
12. കേരളത്തിന്റെ അതിര്ത്തികള് പൂര്ണമായും അടക്കുന്നു. ഇനി ആളുകളെ ഇങ്ങോട്ടോ അങ്ങോട്ടോ പ്രവേശിപ്പിക്കില്ല. പക്ഷേ, മെഡിക്കല് അടക്കം അത്യാവശ്യത്തിന് പോകുന്നവരെയോ, ചരക്ക് ഗതാഗതത്തെയോ തടയില്ല, അവയെല്ലാം കടത്തിവിടും.
13. ബിവറേജസ് ഔട്ട് ലെറ്റുകള് അടയ്ക്കില്ല. പെട്ടെന്ന് മദ്യ വില്പനശാലകള് അടച്ചാല് അത് വലിയ സാമൂഹ്യപ്രത്യാഘാതങ്ങള് ഉണ്ടാക്കും. വ്യാജമദ്യം ഒഴുകും. ഇത് അനുവദിക്കില്ല.