വീട്ടമ്മയുടെ കൊലപാതകം: പണമുണ്ടാക്കി ആസാമിലെ കാമുകിയുടെ അടുത്തെത്താനെന്ന് പ്രതിയുടെ മൊഴി
കോട്ടയം: കോട്ടയത്ത് വീട്ടമ്മ ഷീബയെ കൊലപ്പെടുത്തിയ സംഭവത്തില്‍ അറസ്റ്റിലായ പ്രതി ബിലാലിന്റെ നിര്‍ണായക മൊഴി പുറത്ത്. ഏതുവിധേനയും പണമുണ്ടാക്കി അസമിലുള്ള കാമുകിയുടെ അടുത്തേക്ക് പോകുന്നതിന് വേണ്ടിയാണ് കൊലപാതകം നടത്തിയതെന്ന് ബിലാല്‍ ചോദ്യം ചെയ്യലില്‍ പോലീസിനോട് പറഞ്ഞു. ബിലാലിന് അഞ്ച് ഭാഷകള്‍ അറിയാമെന്നും പോലീസ് പറയുന്നു. ഓണ്‍ലൈന്‍ വഴിയാണ് ബിലാല്‍ അസമിലുള്ള കാമുകിയുമായി പരിചയപ്പെട്ടതെന്നും ബിലാല്‍ പറയുന്നു. അതേസമയം മാനസികാസ്വാസ്ത്യം ഉണ്ടെന്ന ബിലാലിന്റെ കുടുംബത്തിന്‍റെ വാദം പോലീസ് തള്ളിക്കളഞ്ഞു. ബിലാലിന് അതിബുദ്ധിയാണെന്നും പോലീസ് പറഞ്ഞു. കോട്ടയത്ത് കൊലനടത്തിയ വീടും വീട്ടുകാരെയും നേരത്തെ അറിയാമായിരുന്നുവെന്നും പ്രതി പൊലീസിന് മൊഴി നല്‍കി. പ്രതിയെ ആലപ്പുഴയിലെത്തിച്ച്‌ തെളിവെടുപ്പ് നടത്തും. തണ്ണീര്‍മുക്കം ബണ്ടിന് സമീപത്ത് നിന്നും കൊലപാതകത്തിന് ഉപയോഗിച്ച കത്തിയും, മൊബൈല്‍ ഫോണും അന്വേഷണസംഘം കണ്ടെത്തിയിട്ടുണ്ട്.