മന്‍സൂര്‍ കേസ്; മരിച്ച പ്രതിയും ശ്രീരാഗും ഒന്നിച്ച്‌ ഒളിവില്‍ കഴിഞ്ഞിരുന്നുവെന്ന് പോലീസ്
കണ്ണൂര്‍: ലീഗ് പ്രവര്‍ത്തകന്‍ മന്‍സൂര്‍ വധക്കേസിലെ പ്രതി ശ്രീരാഗും കഴിഞ്ഞ ദിവസം മരിച്ച നിലയില്‍ കണ്ടെത്തിയ കേസിലെ മറ്റൊരു പ്രതിയായ രതീഷും ഒന്നിച്ച്‌ ഒളിവില്‍ കഴിഞ്ഞതായി കണ്ടെത്തി. ചെക്യാട് ഭാഗത്ത് വീടുകളിലും പറമ്ബുകളിലുമാണ് ഇരുവരും ഒളിച്ച്‌ താമസിച്ചത്. ഇവര്‍ക്ക് ഒളിവില്‍ കഴിയാന്‍ മറ്റൊരാള്‍ സഹായം ചെയ്തുവെന്നും പോലീസ് കണ്ടെത്തി.
അതേസമയം, രതീഷിനെ കൊലപ്പെടുത്തിയതിന് ശേഷം കെട്ടിത്തൂക്കിയതാണെന്ന ആരോപണവുമായി കോണ്‍ഗ്രസ് നേതാവ് കെ. സുധാകരന്‍ രംഗത്തെത്തിയിരുന്നു. ഒളിവില്‍ കഴിയുന്നതിനിടെ രതീഷ് ഒരു നേതാവിനെ ഭയപ്പെടുത്തി സംസാരിച്ചു. ആ നേതാവിന്‍റെ പേര് ഇപ്പോള്‍ പറയാന്‍ താത്പര്യപ്പെടുന്നില്ല. ഇതേ ചൊല്ലിയുണ്ടായ തര്‍ക്കമാണ് കൊലപാതകത്തിലേക്ക് നയിച്ചത്.
മറ്റ് പ്രതികള്‍ മര്‍ദിച്ചതിനെ തുടര്‍ന്ന് രണ്ടാം പ്രതി ബോധരഹിതനായി വീണു. ഇതോടെ മറ്റു പ്രതികള്‍ രതീഷിനെ കെട്ടി തൂക്കുകയാണ് ചെയ്തത്. ഇതാണ് ഞങ്ങള്‍ക്ക് കിട്ടിയ വിവരം. പാര്‍ട്ടി ഗ്രാമത്തില്‍ നിന്നും ലഭിച്ച വ്യക്തമായ രഹസ്യ വിവരത്തിന്‍റെ അടിസ്ഥാനത്തിലാണ് ഇക്കാര്യം പറയുന്നത്. സുധാകരന്‍ പറഞ്ഞു.