തദ്ദേശ തെരെഞ്ഞെടുപ്പ്; വോട്ടിങ് യന്ത്രങ്ങള്‍ തയ്യാര്‍; ഡിഎംഎം സീലും പിങ്ക് പേപ്പര്‍ സീലും ഉപയോഗിച്ചു മുദ്രവച്ചു
തിരുവനന്തപുരം: ∙ തദ്ദേശ തിരഞ്ഞെടുപ്പില്‍ വോട്ടെടുപ്പിനുള്ള ഇലക്‌ട്രോണിക് വോട്ടിങ് യന്ത്രങ്ങളുടെ ആദ്യ ഘട്ട സാങ്കേതിക പരിശോധന ഇലക്‌ട്രോണിക് കോര്‍പറേഷന്‍ ഓഫ് ഇന്ത്യ ലിമിറ്റഡിലെ എന്‍ജിനീയര്‍മാര്‍ പൂര്‍ത്തിയാക്കുകയുണ്ടായി. വോട്ടെണ്ണല്‍ കഴിയുംവരെ കനത്ത സുരക്ഷയിലാണ് ഇവ സൂക്ഷിക്കുന്നത്. യന്ത്രത്തിന്റെ കണ്‍ട്രോള്‍, ബാലറ്റ് യൂണിറ്റുകള്‍ ഇവയെ തമ്മില്‍ ബന്ധിപ്പിക്കുന്ന കേബിള്‍, കണക്ടര്‍, അവ കൊണ്ടുപോകുന്നതിനുള്ള പെട്ടി തുടങ്ങിയവ പരിശോധിച്ച്‌ കേടില്ലെന്ന് ഉറപ്പാക്കുകയാണ് ആദ്യ ഘട്ട പരിശോധനയില്‍ ചെയ്യുന്നത്.
കണ്‍ട്രോള്‍ യൂണിറ്റിന്റെയും ബാലറ്റ് യൂണിറ്റിന്റെയും എല്ലാ സ്വിച്ചുകളും ഫ്ലാപ്പുകളും സീല്‍ ചെയ്യുന്നതിനുള്ള ഭാഗങ്ങളും പരിശോധിച്ചശേഷം യന്ത്രത്തിന്റെ പ്രവര്‍ത്തനക്ഷമതയും ഉറപ്പാക്കുകയും ഉണ്ടായി. പരിശോധന പൂര്‍ത്തിയാക്കിയ കണ്‍ട്രോള്‍ യൂണിറ്റ് പൂര്‍ണമായി ഡിഎംഎം സീലും പിങ്ക് പേപ്പര്‍ സീലും ഉപയോഗിച്ചു മുദ്രവച്ചിരിക്കുകയാണ്. കനത്ത സുരക്ഷയില്‍ പ്രത്യേക കേന്ദ്രത്തിലാണ് ഈ യന്ത്രങ്ങള്‍ സൂക്ഷിക്കുക. ജില്ലാ കലക്ടര്‍ ഡോ. നവ്ജ്യോത് ഖോസയുടെ മേല്‍നോട്ടത്തില്‍ തിരഞ്ഞെടുപ്പ് വിഭാഗം ഡപ്യൂട്ടി കലക്ടര്‍ ജോണ്‍ സാമുവല്‍ പരിശോധനാ നടപടികളെ ഏകോപിപ്പിക്കുകയുണ്ടായി.
Related News