കോവിഡ് പ്രതിസന്ധിയെ ഇന്ത്യ അവസരമാക്കി മാറ്റും; പ്രധാനമന്ത്രി നരേന്ദ്ര മോദി
ന്യൂഡല്ഹി: കോവിഡ് പ്രതിസന്ധിയെ ഇന്ത്യ അവസരമായി മാറ്റുമെന്ന് പ്രധാനമന്ത്രി നരേന്ദ്ര മോദി. വാണിജ്യ ഖനനത്തിനായുള്ള കല്ക്കരി ഖനികളുടെ ലേലത്തിന് തുടക്കം കുറിച്ചുകൊണ്ട് സംസാരിക്കുകയായിരുന്നു അദ്ദേഹം. വീഡിയോ കോണ്ഫറന്സിലൂടെയാണ് ലേലം ആരംഭിച്ചത്. 41 കല്ക്കരി ഖനികളാണ് ലേലം ചെയ്യുന്നത്. കൊറോണ വൈറസ് മൂലമുള്ള സാമ്പത്തിക പ്രതിസന്ധിയെ മറി കടക്കാനായി സര്ക്കാര് വിഭാവനം ചെയ്ത ആത്മ നിര്ഭര് ഭാരത് നടപടികളുടെ ഭാഗമായാണ് കല്ക്കരി ഖനികള് ലേലം ചെയ്യുന്നത്.
ഇന്ത്യയെ ഊര്ജ മേഖലയില് സ്വയം പര്യാപ്തമാക്കാന് ഉതകുന്നതാണ് ഈ നടപടിയെന്ന് രാജ്യത്തെ അഭിസംബോധന ചെയ്തുകൊണ്ട് പ്രധാനമന്ത്രി വ്യക്തമാക്കി. രാജ്യം പ്രതിസന്ധികളെ അവസരമാക്കി മാറ്റും. ഇറക്കുമതിയെ ആശ്രയിക്കുന്നത് കുറയ്ക്കലാണ് സ്വയം പര്യാപ്തത. ഇന്ത്യ ഏറ്റവും വലിയ കയറ്റുമതി രാഷ്ട്രമാകും. രാജ്യം ഉടന് കല്ക്കരി ഉത്പാദനത്തില് മുന്നിലെത്തും. ഈ മേഖലയില് ഇന്ത്യ ഏറ്റവും വലിയ കയറ്റുമതി രാഷ്ട്രമാകുമെന്നും പ്രധാനമന്ത്രി വ്യക്തമാക്കി. കല്ക്കരി ഖനന ലേലത്തിലൂടെ എല്ലാ എല്ലാമേഖലകളെയും സഹായിക്കാനാകുമെന്നും പ്രധാനമന്ത്രി മോദി വ്യക്തമാക്കി.
കല്ക്കരി ഖനന ലേലം ആരംഭിച്ചതോടെ വ്യവസായങ്ങള്ക്ക് പുതിയ അവസരങ്ങള് ലഭിക്കുമെന്നും പ്രധാനമന്ത്രി മോദി പറഞ്ഞു. വാണിജ്യ കല്ക്കരി ഖനനത്തിന്റെ വ്യാപനം സ്വകാര്യമേഖലയുടെ പങ്കാളിത്തം വര്ദ്ധിപ്പിക്കും, ഇത് ഉയര്ന്ന ഉല്പാദനത്തിലേക്ക് നയിക്കുകയും ഈ മേഖലയില് മത്സരം വര്ദ്ധിക്കുകയും ചെയ്യും. ഇത് രാജ്യത്തെ സാമ്പത്തിക പുരോഗതിയിലേക്ക് നയിക്കുമെന്നും പ്രധാനമന്ത്രി പ്രത്യാശ പ്രകടിപ്പിച്ചു.
ഗ്രാമങ്ങളിലെ ഉപജീവന അവസരങ്ങള് വര്ധിപ്പിക്കുന്നതിനായുള്ള പ്രധാനമന്ത്രി ഗരീബ് കല്യാണ് റോജ്ഗാര് അഭിയാന് പദ്ധതി ജൂണ് 20 ന് ആരംഭിക്കും. സ്വന്തം നാട്ടിലേക്ക് മടങ്ങിയെത്തിയ കുടിയേറ്റ തൊഴിലാളികള്ക്കും ഗ്രാമീണ പൗരന്മാര്ക്കും ഉപജീവനത്തിനുള്ള അവസരവും ശാക്തീകരണവും നല്കുന്നതിനാണ് പദ്ധതി ആരംഭിക്കുന്നതെന്ന് പ്രധാനമന്ത്രിയുടെ ഓഫീസ് അറിയിച്ചു.
കുടിയേറ്റ തൊഴിലാളികളെ സഹായിക്കുന്നതിനായി 6 സംസ്ഥാനങ്ങളില് നിന്നുള്ള 116 ജില്ലകളില് 125 ദിവസങ്ങളില് പദ്ധതിയുടെ ഭാഗമായി ക്യാമ്പെയ്ന് നടത്തും. പ്രധാനമന്ത്രി ഗരീബ് കല്യാണ് പാക്കേജിലൂടെ 39 കോടി ജനങ്ങള്ക്ക് 34,000 കോടി രൂപയുടെ സാമ്പത്തിക സഹായം ലഭിച്ചുവെന്നും ഔദ്യോഗിക വൃത്തങ്ങള് അറിയിച്ചു. കൊറോണ വൈറസ് വ്യാപനത്തെ തുടര്ന്ന് സാമ്പത്തിക പ്രതിസന്ധിയിലായ ജനങ്ങളെ സഹായിക്കാന് ധനമന്ത്രി നിര്മ്മലാ സീതാരാമന് പ്രഖ്യാപിച്ച സാമ്പത്തിക പാക്കേജിലാണ് ഈ തുക അനുവദിച്ചത്.