ഐ.എഫ്.എഫ്.കെ ഡെലിഗേറ്റ് രജിസ്ട്രേഷന് 30 മുതല്
തിരുവനന്തപുരം: ഐ.എഫ്.എഫ്.കെ ഡെലിഗേറ്റ് രജിസ്ട്രേഷന് ഈ മാസം 30 മുതല് ആരംഭിക്കും. ഇത്തവണ വിപുലമായ ആഘോഷമുണ്ടാകില്ലെന്ന് മുഖ്യമന്ത്രി പിണറായി വിജയന് അറിയിച്ചു. ആകെ എണ്ണായിരം പാസ്സുകളാണ് അനുവദിക്കുക. കൊവിഡ് നെഗറ്റീവ് സര്ട്ടിഫിക്കറ്റ് ഉള്ളവര്ക്ക് മാത്രമായിരിക്കും പ്രവേശനം ഉണ്ടായിരിക്കുക. നാല് മേഖലകളിലായാണ് മേള നടക്കുന്നത്. ചലച്ചിത്ര അക്കാദമി സംസ്ഥാന ചലച്ചിത്ര അവാര്ഡുകള് നാളെ വിതരണം ചെയ്യും.
ഫെബ്രുവരി 10 മുതലാണ് ഐ.എഫ്.എഫ്.കെ നടക്കുക. തിരുവനന്തപുരം, എറണാകുളം, പാലക്കാട്, തലശേരി എന്നിവിടങ്ങളിലാണ് മേള. ഓരോ മേഖലയിലെയും അഞ്ച് തിയേറ്ററുകളില് അഞ്ചുദിവസമായാണ് പ്രദര്ശനങ്ങളുണ്ടാവുക. സിനിമകള് പ്രദര്ശിപ്പിക്കുന്ന തിയേറ്ററുകളില് ആകെ 200 പേര്ക്ക് മാത്രമായിരിക്കും പ്രവേശനം. കോവിഡ് നെഗറ്റീവ് സര്ട്ടിഫിക്കറ്റ് ഉള്ളവരെ മാത്രമായിരിക്കും മേളയില് പ്രവേശിപ്പിക്കുക. രജിസ്ട്രേഷന് 48 മണിക്കൂറിനിടെ ലഭിച്ച കൊവിഡ് നെഗറ്റീവ് സര്ട്ടിഫിക്കറ്റാണ് അപേക്ഷകര് ഹാജരാക്കേണ്ടത്. അപേക്ഷാ ഫീസ് 750 രൂപയായി കുറച്ചിട്ടുണ്ട്.
ഒരാള്ക്ക് ഒരു സ്ഥലത്ത് മാത്രമേ രജിസ്റ്റര് ചെയ്യാന് കഴിയൂ. തെരഞ്ഞെടുത്ത മേഖല മാറ്റാനാകില്ല. തിരുവനന്തപുരത്തും കൊച്ചിയിലും 2500 പാസുകളാണ് നല്കുക. പാലക്കാടും തലശേരിയിലും 1500 പാസുകള് നല്കും. 8 ന് തിരുവനന്തപുരത്ത് പാസ് വിതരണം ആരംഭിക്കും. കോവിഡ് നെഗറ്റീവായവര്ക്ക് മാത്രമാകും പാസ് നല്കുക. പാസ് വിതരണ കേന്ദ്രത്തില് പരിശോധന സംവിധാനം ഉണ്ടാകും.
റിസര്വേഷനിലൂടെ മാത്രമെ ചിത്രം കാണാനാകൂ. 24 മണിക്കൂര് മുമ്ബ് റിസര്വ് ചെയ്യണം. സിനിമ തുടങ്ങുന്നതിന് 2 മണിക്കൂര് മുമ്ബ് സീറ്റ് നമ്ബര് SMS വഴി ലഭിക്കും. കൈരളി, ശ്രീ ,നിള, കലാഭവന്, ടഗോര്, നിശാഗന്ധി എന്നിവയാണ് തിരുവനന്തപുരത്തെ തീയറ്ററുകള്. കേരളത്തിന് ആഗോളശ്രദ്ധ നേടിത്തന്ന ചലചിത്രമേള പോലുള്ള പരിപാടികള് റദ്ദാക്കുന്നത് ഉചിതമല്ലെന്ന് കരുതിയാണ് ഐ.എഫ്.എഫ്.കെ നടത്താന് തീരുമാനമെടുത്തതെന്ന് മന്ത്രി എ.കെ ബാലന് വ്യക്തമാക്കിയിരുന്നു.