സ്വര്ണ്ണക്കടത്ത് കേസ്: മൂന്നു പേരെ കൂടി കസ്റ്റംസ് അറസ്റ്റ് ചെയ്തു
തിരുവനന്തപുരം: സ്വര്ണ്ണക്കടത്തു കേസില് മൂന്ന് പ്രതികളെക്കൂടി കസ്റ്റംസ് അറസ്റ്റ് ചെയ്തു. മലപ്പുറം സ്വദേശി മുഹമ്മദ് ഷാഫി, മൂവാറ്റുപുഴ സ്വദേശി ജലാല്, കൊണ്ടോട്ടി സ്വദേശി ഹംജദ് അലി എന്നിവരെയാണ് അറസ്റ്റ് ചെയ്തത്. ഇവരായിരുന്നു സ്വര്ണ്ണം ഇടപാടുകാരിലേക്ക് എത്തിച്ചിരുന്നത്.
ഇവരില് നിന്നും കൂടുതല് പ്രതികളെ സംബന്ധിച്ച് സൂചന ലഭിച്ചുവെന്നും അതിന്റെ അടിസ്ഥാനത്തില് കൂടുതല് അറസ്റ്റുകളുണ്ടാകുമെന്നും സൂചനയുണ്ട്. വളരെക്കാലമായി കസ്റ്റംസ് തിരച്ചില് നടത്തുന്ന ജലാല് ഇന്നലെ കീഴടങ്ങിയിരുന്നു. സ്വര്ണ്ണക്കടത്ത് കേസില് പിടിയിലായ റമീസുമായും ഇയാള്ക്ക് ബന്ധമുണ്ട്. ജലാല് സ്വര്ണ്ണം കടത്താന് ഉപയോഗിച്ചിരുന്ന കാര് ഇന്നലെ കസ്റ്റംസ് കണ്ടെത്തിയിരുന്നു.
ഇയാളുടെ വീട്ടില് നിന്നുമാണ് കാര് പിടിച്ചെടുത്തത്. മുന് സീറ്റിനടിയില് രഹസ്യ അറകള് ഉണ്ടാക്കി അതിലായിരുന്നു സ്വര്ണ്ണക്കടത്ത് നടത്തിയിരുന്നത്. അറസ്റ്റിലായ മൂന്നുപേരും കേരളത്തിലെത്തുന്ന സ്വര്ണ്ണത്തിന് കച്ചവടം ഉറപ്പിക്കുകയും വിതരണം ചെയ്യുകയും ചെയ്യുന്നവരാണ് എന്നാണ് റിപ്പോര്ട്ട്. മൂവരേയും ഇന്ന് കൊച്ചിയിലെ സാമ്പത്തിക കുറ്റകൃത്യങ്ങള്ക്കായുള്ള കോടതിയില് ഹാജരാക്കുമെന്നാണ് വിവരം.