ഫഹദ് ഫാസിലിന് കെട്ടിടത്തിന് മുകളില്‍നിന്നു വീണ് പരിക്ക്
കൊച്ചി: നടന്‍ ഫഹദ് ഫാസിലിന് ഷൂട്ടിംഗിനിടെ പരിക്ക്. 'മലയന്‍കുഞ്ഞ്' എന്ന സിനിമയുടെ ചിത്രീകരണത്തിനിടെയാണ് പരിക്ക്. പാതാളത്തെ സ്റ്റുഡിയോയില്‍ സിനിമാ ചിത്രീകരണം നടക്കുന്നതിനിടെയാണ് സംഭവമുണ്ടായത്.
സിനിമയില്‍ വീട് മണ്ണിനടിയിലേക്ക് ഒലിച്ചു പോകുന്ന രംഗം ചിത്രീകരിക്കുന്നതിനിടെയാണ് താരത്തിന് പരിക്കേറ്റത്. ഷൂട്ടിംഗിനായി നിര്‍മ്മിച്ച വീടിന്റെ മുകളില്‍ നിന്നാണ് താരം വീണത്. മൂക്കിന്റെ പാലത്തിന് പൊട്ടലുണ്ട്. കൊച്ചിയിലെ സ്വകാര്യ ആശുപത്രിയില്‍ അദ്ദേഹത്തെ ശസ്ത്രക്രിയക്ക് വിധേയമാക്കി.
വീഴ്‌ചയുടേതായ ചെറിയ വേദനകള്‍ മാത്രമാണ് താരത്തിനുളളതെന്നും നിലവില്‍ വിശ്രമത്തിലാണെന്നും താരത്തോട് അടുത്ത വൃത്തങ്ങള്‍ അറിയിച്ചു. സംഭവത്തെ തുടര്‍ന്ന് സിനിമയുടെ ചിത്രീകരണം താത്ക്കാലികമായി നിര്‍ത്തിവച്ചതായി അണിയറ പ്രവര്‍ത്തകര്‍ അറിയിച്ചു. സജിമോന്‍ പ്രഭാകര്‍ സംവിധാനം ചെയ്യുന്ന 'മലയന്‍കുഞ്ഞി'ന്റെ തിരക്കഥ മഹേഷ് നാരായണന്റേതാണ്. സംവിധായകനും ഫഹദ് ഫാസിലിന്റെ പിതാവുമായ ഫാസിലാണ് ചിത്രം നിര്‍മ്മിക്കുന്നത്.
Related News
പൃഥ്വിയ്ക്കു പിന്നാലെ റേഞ്ച് റോവര് സ്വന്തമാക്കി ഫഹദും