കോവിഡ് 19; മെഡിക്കൽ കോളേജ് ക്യാമ്പസ് ഫയർഫോഴ്സ് അണുവിമുക്തമാക്കി
തിരുവനന്തപുരം: മെഡിക്കൽ കോളേജ് ക്യാമ്പസ് ഫയർഫോഴ്സിന്റെ സഹായത്തോടെ അണുവിമുക്തമാക്കി. കോ വിഡ്- 19 ന്റെ പശ്ചാത്തലത്തിൽ നടക്കുന്ന ശുചീകരണ പ്രവർത്തനങ്ങളുടെ ഭാഗമായാണ് മെഡിക്കൽ കോളേജ് വളപ്പ് അണുവിമുക്തമാക്കിയത്. ആശുപത്രി സൂപ്രണ്ട് ഡോ എം എസ് ഷർമ്മദ് അറിയിച്ചതനുസരിച്ച് തിങ്കളാഴ്ച ചെങ്കൽചൂളയിൽ നിന്നും ഫയർഫോഴ്സെത്തി അണുനാശിനി സ്പ്രേ ചെയ്യുകയായിരുന്നു. ആശുപത്രിയുടെ പ്രധാന കെട്ടിടം, മൾട്ടി സ്പെഷ്യാലിറ്റി ബ്ലോക്ക്, സൂപ്പർ സ്പെഷ്യാലിറ്റി ബ്ലോക്ക്, ഒ പി ബ്ലോക്ക്, നേഴ്സിംഗ് കോളേജ് തുടങ്ങി മെഡിക്കൽ കോളേജ് ക്യാമ്പസ് മുഴുവനും അണുവിമുക്തമാക്കി. രോഗവ്യാപനം തടയുന്നതിനായി സർക്കാർ നിർദേശങ്ങൾ പാലിച്ചുകൊണ്ടുള്ള പ്രവർത്തനങ്ങൾ ആശുപത്രിയിൽ തുടരുകയാണ്.
കഴിഞ്ഞ ദിവസം കോവിഡ് 19 നുമായി ബന്ധപ്പെട്ട് ആശുപത്രിയിൽ ചികിത്സയിലുള്ളവരെ മൾട്ടി സ്പെഷ്യാലിറ്റി ബ്ലോക്കിലേയ്ക്ക് മാറ്റിയിരുന്നു. ഐ സി യു കിടക്കകളുടെ എണ്ണം വർധിപ്പിച്ച് കൂടുതൽ ചികിത്സാ സൗകര്യങ്ങളും ഏർപ്പെടുത്തി. ആശുപത്രിയിൽ ചികിത്സയിലുള്ള മറ്റു രോഗികൾക്കും കൂട്ടിരിപ്പുകാർക്കും ഡോക്ടർമാർ ഉൾപ്പെടെയുള്ള ആശുപത്രി ജീവനക്കാർക്കും വേണ്ട സുരക്ഷാ ക്രമീകരണങ്ങളും ഏർപ്പെട്ടുത്തി. രോഗവ്യാപനം ചെറുക്കാൻ ഒ പി യുടെ പ്രവർത്തനം നിയന്ത്രിച്ചതുൾപ്പെടെ വിവിധ ഘട്ടങ്ങളിലായി നിരവധി രോഗപ്രതിരോധ പ്രവർത്തനങ്ങൾ അധികൃതർ നടപ്പിലാക്കി വരികയാണ്. അതിന്റെ ഭാഗമായാണ് ക്യാമ്പസ് അണുവിമുക്തമാക്കലും നടന്നത്. തിങ്കളാഴ്ച രാവിലെ മുതൽ വൈകുന്നേരം വരെ നടന്ന അണുവിമുക്തമാക്കൽ പ്രവർത്തനം സെക്യൂരിറ്റി ഓഫീസർ അജിത് കുമാറിന്റെ മേൽനോട്ടത്തിലാണ് നടന്നത്.