കൊറോണ പ്രതിരോധം: ഡല്ഹിയില് വാരാന്ത്യ കര്ഫ്യൂ പ്രഖ്യാപിച്ചു
ന്യുഡല്ഹി: ഡല്ഹിയില് കൊറോണ വ്യാപനം രൂക്ഷമായതോടെ വാരാന്ത്യ കര്ഫ്യു പ്രഖ്യാപിച്ച് സര്ക്കാര്. ലഫ്റ്റനന്റ് ഗവര്ണര് അനില് ബയ്ജാലുമായി നടത്തിയ കൂടിക്കാഴ്ചയ്ക്കു ശേഷം മുഖ്യമന്ത്രി അരവിന്ദ് കെജ്രിവാളാണ് ഇക്കാര്യം അറിയിച്ചത്. മാളുകള്, ചന്തകള്, ജിംനേഷ്യം തുടങ്ങിയവ വാരാന്ത്യങ്ങളില് അടച്ചിടും.
വിവാഹം പോലുള്ള ചടങ്ങുകള്ക്ക് പാസ് എടുക്കണം. സിനിമാ ഹാളില് 30 ശതമാനം ആളുകള്ക്ക് മാത്രം പ്രവേശനം. ഹോട്ടലുകളില് ഇരുന്ന് ഭക്ഷണം കഴിക്കാന് പാടില്ല. പാഴ്സല് സര്വ്വീസുകള് അനുവദിക്കും. ആശുപത്രികളില് നിലവില് കിടക്കകള്ക്ക് ക്ഷാമമില്ലെന്നും അവശ്യ സര്വ്വീസുകള്ക്ക് നിയന്ത്രണം ഏര്പ്പെടുത്തില്ലെന്നും അരവിന്ദ് കെജ്രിവാള് അറിയിച്ചു.
സംസ്ഥാനത്ത് നിലവില് രാത്രികാല കര്ഫ്യൂ സര്ക്കാര് പ്രഖ്യാപിച്ചിട്ടുണ്ട്. ഏപ്രില് 30 വരെയാണ് കര്ഫ്യൂ. കൂടാതെ ഗതാഗതത്തിന് ഇപാസ് അടക്കമുള്ള നിയന്ത്രണങ്ങളാണ് നേരത്തെ ഏര്പ്പെടുത്തിയിട്ടുള്ളത്. അടിയന്തിര അവശ്യ സേവനങ്ങള്ക്ക് മാത്രമാണ് സംസ്ഥാനത്ത് അനുമതിയുള്ളത്. ഇതിന് പിന്നാലെയാണ് വാരാന്ത്യ കര്ഫ്യൂ സര്ക്കാര് പ്രഖ്യാപിച്ചത്.
അതിനിടെ ഡല്ഹിയില് ഇന്നലെ 17,282 പേര്ക്കാണ് കൊറോണ സ്ഥിരീകരിച്ചത്. 104 പേര് രോഗം ബാധിച്ച് മരിച്ചു. സംസ്ഥാനത്ത് ഇതുവരെ 7,67,438 പേര്ക്കാണ് രോഗം സ്ഥിരീകരിച്ചിട്ടുള്ളത്. ഇതില് 50,736 പേര് ചികിത്സയിലുണ്ട്. ടെസ്റ്റ് പോസിറ്റിവിറ്റി നിരക്ക് 15.92 ശതമാനമായി ബുധനാഴ്ച ഉയര്ന്നത് ആശങ്കപ്പെടുത്തുന്നതാണ്.