സത്യപ്രതിജ്ഞ ചെയ്ത് മൂന്നാം നാള് രാജിവച്ച് ബിഹാര് വിദ്യാഭ്യാസ മന്ത്രി
പാറ്റ്ന : സത്യപ്രതിജ്ഞ ചെയ്ത് അധികാരമേറ്റതിന്റെ മൂന്നാം നാള് ബിഹാര് വിദ്യാഭ്യാസ മന്ത്രി മേവാലാല് ചൗധരി രാജിവച്ചു. നിയമന അഴിമതി ആരോപണത്തെ തുടര്ന്നാണ് രാജി . താരാപുരില്നിന്നുള്ള ജെഡിയു എംഎല്എയായ ഇദ്ദേഹം ഭഗല്പുര് വൈസ് ചാന്സലര് ആയിരിക്കെ അസിസ്റ്റന്റ് പ്രൊഫസര്, ജൂനിയര് സയന്റിസ്റ്റ് എന്നീ തസ്തികകളിലേക്കുള്ള നിയമനങ്ങളില് ക്രമക്കേട് നടത്തിയെന്നാണ് ആരോപണം. ഇദ്ദേഹത്തിനെതിരെ ക്രമിനല് കേസ് എടുക്കുകയും ചെയ്തിരുന്നു.
നേരത്തെ പ്രതിപക്ഷത്തായിരുന്ന ബിജെപി ആക്ഷേപമുയര്ത്തിയതോടെ പാര്ട്ടിയില്നിന്നും സസ്പെന്ഡും ചെയ്തിരുന്നു. രാഷ്ട്രപതി രാംനാഥ് കോവിന്ദ് അന്നത്തെ ബിഹാര് ഗവര്ണര് ആയിരിക്കെ മേവാലാലിനെതിരെ കേസെടുക്കാനും അന്വേഷണം നടത്താനും അനുമതി നല്കിയിരുന്നു. എന്നാല് 2017 ല് ചാര്ജ് ചെയ്ത കേസില് ഇതുവരെ കുറ്റപത്രം സമര്പ്പിച്ചിട്ടില്ല.