നിയന്ത്രണം കടുപ്പിച്ച് എറണാകുളം; ഹോട്ടലുകളില് പാഴ്സല് മാത്രം
കൊച്ചി: കോവിഡ് വ്യാപനം അതിരൂക്ഷമായ ജില്ലയില് കൂടുതല് നിയന്ത്രണങ്ങള് ഏര്പ്പെടുത്തി. വ്യാപാരസ്ഥാപനങ്ങളുടെ പ്രവര്ത്തന സമയം രാവിലെ ഏഴ് മുതല് വൈകുന്നേരം അഞ്ച് വരെ ആക്കി ചുരുക്കി. തീയറ്ററുകളും മെയ് രണ്ടുവരെ അടച്ചിടും.
സിനിമാ ചിത്രീകരണവും നിരോധിച്ചു. ഹോട്ടലുകളിലും റസ്റ്റോറന്റുകളിലും പാഴ്സല് സര്വീസ് മാത്രമാക്കി. രാവിലെ ഏഴു മുതല് രാത്രി ഒന്പതുവരെയാണ് പ്രവര്ത്തന സമയം. ജില്ലയില് ഇന്ന് 4468 പേര്ക്ക് ആണ് കോവിഡ് സ്ഥിരീകരിച്ചത്. 30 പ്രദേശങ്ങളെ കണ്ടെയ്ന്മെന്റ് സോണുകളായി പ്രഖ്യാപിച്ചിട്ടുണ്ട്.
നിയന്ത്രണങ്ങള്
*ജില്ലയില് വാണിജ്യ വ്യാപാര സ്ഥാപനങ്ങള് രാവിലെ ഏഴ് മുതല് വൈകുന്നേരം അഞ്ച് വരെ മാത്രം
*ഹോട്ടലുകളിലും റസ്റ്റോറന്റുകളിലും രാവിലെ ഏഴു മുതല് വൈകുന്നേരം ഒന്പതുവരെ പാഴ്സല് സര്വീസ് മാത്രം. ബാറുകള്ക്കും കള്ളുഷാപ്പുകള്ക്കും നിയന്ത്രണം ബാധകം.
*വിവാഹങ്ങളും മരണാനന്തര ചടങ്ങുകളും കോവിഡ് ജാഗ്രതാ പോര്ട്ടലില് രജിസ്റ്റര് ചെയ്യണം.
*വിവാഹങ്ങളില് പരമാവധി പങ്കെടുക്കാവുന്നത് 30 പേര്
*മരണാനന്തര ചടങ്ങുകളില് 20 പേര്
*കുടുംബയോഗങ്ങള് ഉള്പ്പെടെ ഒരുതരത്തിലുള്ള ഒത്തുചേരലും അനുവദിക്കില്ല
*പാര്ക്കുകള്, ക്ലബുകള് എന്നിവ പ്രവര്ത്തിക്കാന് പാടില്ല
*ജിനേഷ്യം, കായിക വിനോദങ്ങള്, ടൂര്ണമെന്റുകള് എന്നിവ നിരോധിച്ചു
*തീയറ്ററുകള് മെയ് രണ്ടുവരെ പ്രവര്ത്തിക്കാന് പാടില്ല. സിനിമാ ചിത്രീകരണവും നിരോധിച്ചു
*എസ്എസ്എല്സി, പ്ലസ്ടു പരീക്ഷകള് ഒഴികെ മറ്റെല്ലാ പരീക്ഷകളും മാറ്റിവച്ചു