ഐ എസില് ചേര്ന്ന മലയാളി വനിതകളെ ഇന്ത്യയിലേക്ക് മടക്കി കൊണ്ടുവന്നേക്കില്ല
ഇന്ത്യയില് നിന്നും മതംമാറി ഐ.എസില് ചേര്ന്ന മലയാളി യുവതികളെ തിരികെ നാട്ടിലേക്ക് പ്രവേശിപ്പിക്കില്ലെന്ന് കേന്ദ്ര സര്ക്കാര്. ഐ.എസ് ഭീകരരായ ഭര്ത്താക്കന്മാര് കൊല്ലപ്പെട്ടതോടെയാണ് രാജ്യത്തേക്ക് മടങ്ങണമെന്ന് ഇവര് ആവശ്യപ്പെട്ടത്. എന്നാല്, ഭീകരസംഘടനയില് പ്രവര്ത്തിച്ച ഇവരെ ഒരു കാരണവശാലും രാജ്യത്ത് കാലുകുത്തിക്കില്ലെന്ന് കേന്ദ്രസര്ക്കാര് വ്യക്തമാക്കി.
അയിഷയെന്ന സോണിയാ സെബാസ്റ്റിയന്, റാഫേലാ, മറിയമെന്ന് പേരുമാറ്റിയ മെറിന് ജേക്കബ്, ഫാത്തിമ ഇസ എന്ന് പേരുമാറ്റിയ നിമിഷ എന്നിവരാണ് ഐഎസ് ഭീകരരായി എത്തിപ്പെട്ട് ജയിലില് ഉള്ളത്. ഇവര്ക്കൊപ്പം രണ്ട് ഇന്ത്യന് വനിതകളും ഒരു പുരുഷനും ജയിലിലുണ്ട്. കുട്ടികള്ക്കൊപ്പം നിലവില് അഫ്ഗാന് ജയിലുകളിലുള്ള വിദേശപൗരന്മാരായ ഭീകരരെ അവരവരുടെ രാജ്യങ്ങളിലേക്ക് മടക്കിവിടാനുള്ള നിരന്തര പരിശ്രമമാണ് നടക്കുന്നത്.
2016-18 കാലയളവില് അഫ്ഗാനിസ്ഥാനിലെ നന്ഗര്ഹറിലേക്ക് ഭര്ത്താക്കന്മാര്ക്കൊപ്പം എത്തിയവരാണ് ഇവര് നാലുപേരും. അഫ്ഗാനിസ്ഥാനിലുണ്ടായിരുന്ന വിവിധ ഏറ്റുമുട്ടലുകളില് വെച്ച് ഇവരുടെ ഭര്ത്താക്കന്മാര് കൊല്ലപ്പെടുകയായിരുന്നു. തുടര്ന്ന് ഇവരെല്ലാം സൈന്യത്തിന്റെ പിടിയിലായി. നിരവധി സ്ത്രീകളേയും കുട്ടികളേയും സൈന്യം കാബൂളിലെ ജയിലില് പാര്പ്പിച്ചിരിക്കുകയാണ്. ജയിലില് കിടക്കുന്നവരെ ഇന്ത്യന് അന്വേഷണ സംഘം ചോദ്യം ചെയ്തിരുന്നു. എല്ലാവരും കടുത്ത മതമൗലികവാദികളാണെന്നാണ് ബോധ്യപ്പെട്ടത്. ഇതോടെയാണ് ഇന്ത്യയെ വഞ്ചിച്ചുകൊണ്ട് ഭീകരതയ്ക്കായി പോയവരെ തിരികെ സ്വീകരിക്കാനാവില്ലെന്ന കര്ശന നിലപാട് ഇന്ത്യ അറിയിച്ചിരിക്കുന്നത്.