25 ശതമാനത്തിലധികം പേര് സംസ്ഥാനത്ത് ഒന്നാം ഡോസ് വാക്സിന് സ്വീകരിച്ചു
സംസ്ഥാനത്ത് ജനസംഖ്യയുടെ 25 ശതമാനത്തിലധികം പേര്ക്ക് ഒന്നാം ഡോസ് കോവിഡ് 19 വാക്സിന് നല്കിയതായി ആരോഗ്യ വകുപ്പ് മന്ത്രി വീണാ ജോര്ജ് അറിയിച്ചു. സംസ്ഥാനത്ത് ഇതുവരെ ആകെ 1,09,61,670 ഡോസ് വാക്സിനാണ് നല്കിയത്. അതില് 87,52,601 പേര്ക്ക് ഒന്നാം ഡോസ് വാക്സിനും 22,09,069 പേര്ക്ക് രണ്ടാം ഡോസ് വാക്സിനുമാണ് നല്കിയത്. 2011ലെ സെന്സസ് അനുസരിച്ച് 26.2 ശതമാനം പേര്ക്ക് ഒന്നാം ഡോസും 6.61 ശതമാനം പേര്ക്ക് രണ്ടാം ഡോസും നല്കിയിട്ടുണ്ട്. ഏറ്റവുമധികം വാക്സിന് നല്കിയത് തിരുവനന്തപുരത്താണ്.
10,08,936 പേര്ക്ക് ഒന്നാം ഡോസ് വാക്സിനും 2,81,828 പേര്ക്ക് രണ്ടാം ഡോസ് വാക്സിനും ഉള്പ്പെടെ 12,90,764 ഡോസ് വാക്സിനാണ് തിരുവനന്തപുരം ജില്ലയില് നല്കിയത്. കോവിഡ് മൂന്നാം തരംഗത്തെ നേരിടാനായി ആക്ഷന് പ്ലാന് രൂപീകരിച്ച് പരമാവധി പേര്ക്ക് വാക്സിന് നല്കാനുള്ള ശ്രമത്തിലാണ് ആരോഗ്യ വകുപ്പെന്നും മന്ത്രി വ്യക്തമാക്കി.
മന്ത്രി വീണാ ജോര്ജിന്റെ നേതൃത്വത്തില് കഴിഞ്ഞ ദിവസം വാക്സിനേഷന് ടീമിന്റെ അവലോകന യോഗം നടത്തി. വാക്സിന് ലഭ്യമാക്കുന്ന മുറയ്ക്ക് വാക്സിനേഷന് പ്രക്രിയ വേഗത്തിലാക്കാന് മന്ത്രി നിര്ദേശം നല്കി.സംസ്ഥാനത്തിനാകെ ഇതുവരെ 1,05,13,620 ഡോസ് വാക്സിനാണ് ലഭ്യമായത്.