ആഭ്യന്തരവും ആരോഗ്യവും മമത ബാനര്‍ജി തന്നെ കൈകാര്യം ചെയ്യും; ബംഗാളില്‍ 43 മന്ത്രിമാര്‍

News Desk

11 May 2021 01:04 PM

ന്യൂഡല്‍ഹി: പശ്ചിമ ബംഗാളില്‍ മമത ബാനര്‍ജി സര്‍ക്കാറിലെ മന്ത്രിമാരും അധികാരമേറ്റും. മുഖ്യമന്ത്രി മമത ബാനര്‍ജി ആഭ്യന്തരവും ആരോഗ്യവും അടക്കമുള്ള വകുപ്പുകള്‍ കൈകാര്യം ചെയ്യുമ്ബോള്‍ കഴിഞ്ഞ മന്ത്രിസഭയിലെ അമന്‍ മിത്ര ത്‌ന്നെ ധനമന്ത്രിയായി തുടരും. മന്ത്രിസഭയിലെ 43 അംഗങ്ങളാണ് കഴിഞ്ഞ ദിവസം അധികാരമേറ്റത്. ഗവര്‍ണര്‍ ജഗ്ദീപ് ധന്‍കര്‍ മന്ത്രിമാര്‍ക്കു സത്യവാചകം ചൊല്ലിക്കൊടുത്തു. മുന്‍ മന്ത്രിസഭയിലെ 17 പേര്‍ ഇത്തവണയുമുണ്ട്. 24 കാബിനറ്റ് മന്ത്രിമാരും 10 സ്വതന്ത്ര ചുമതലയുള്ള സഹമന്ത്രിമാരും 9 സഹമന്ത്രിമാരുമുണ്ട്.
ശ്വാസകോശ രോഗം മൂലം മത്സരിക്കാതിരുന്ന മുന്‍ ധനമന്ത്രി അമന്‍ മിത്ര വീണ്ടും ധനമന്ത്രിയായി ചുമതലയേറ്റു. അദ്ദേഹത്തിനു പകരം ഖര്‍ദയില്‍ സ്ഥാനാര്‍ത്ഥിയായിരുന്ന കാജല്‍ സിന്‍ഹ തിരഞ്ഞെടുപ്പിനിടെ കോവിഡ് ബാധിതനായി മരിച്ചിരുന്നു. അമന്‍ മിത്ര, കോവിഡ് ബാധിതരായ ബ്രത്യ ബസു, രതിന്‍ ഘോഷ് എന്നിവര്‍ വെര്‍ച്വലായാണ് സത്യപ്രതിജ്ഞ ചെയ്തത്. മമത കഴിഞ്ഞയാഴ്ച സത്യപ്രതിജ്ഞ ചെയ്ത് അധികാരമേറ്റിരുന്നു.

മുഖ്യമന്ത്രി മമത ബാനര്‍ജി തന്നെയാണ് ആഭ്യന്തരവും ആരോഗ്യവും കൈകാര്യം ചെയ്യുന്നത്. മറ്റു ചില വകുപ്പുകള്‍ കൂടി മമത ഭരിക്കും. മുന്‍ ക്രിക്കറ്റര്‍ മനോജ് തിവാരി സ്പോര്‍ട്സ് സഹമന്ത്രിയാണ്. മമതയെ നന്ദിഗ്രാമില്‍ തോല്‍പിച്ച സുവേന്ദു അധികാരിയെ പ്രതിപക്ഷ നേതാവായി ബിജെപി തിരഞ്ഞെടുത്തു.

മന്ത്രിസഭയില്‍ 18 പേര്‍ പുതുമുഖങ്ങളാണ്. എട്ടു വനിതകളും ന്യൂനപക്ഷ വിഭാഗത്തില്‍പ്പെട്ട ഏഴുപേരും മമതാ ബാനര്‍ജിയുടെ നേതൃത്വത്തിലുള്ള മന്ത്രിസഭയിലുണ്ട്. ആദ്യമായി നിയമസഭയിലെത്തിയ സിനിമാനടി ബിര്‍ബാഹ ഹന്‍സ്ദയും മുന്‍ ഐ.പി.എസ്. ഉദ്യോഗസ്ഥന്‍ ഹുമയൂണ്‍ കബീറും മന്ത്രിമാരായി. മമതയ്‌ക്കെതിരേ മത്സരിച്ച സുവേന്ദു അധികാരി, വിമതന്‍ രാജിവ് ബാനര്‍ജി എന്നിവരുടെ ജില്ലയില്‍ നിന്നുള്ള അഖില്‍ ഗിരി, അരൂപ് റോയ് എന്നിവരും മന്ത്രിസഭയിലുണ്ട്.

അതിനിടെ മമത ബാനര്‍ജി സര്‍ക്കാറിലെ മന്ത്രിമാര്‍ അധികാരമേറ്റതിന് പിന്നാലെ നാരദ ഒളിക്യാമറാ കേസില്‍ പ്രോസിക്യൂട്ടു ചെയ്യാന്‍ ഗവര്‍ണര്‍ അനുമതി നല്‍കിയത് വിവാദമായി. പുതുതായി സത്യപ്രതിജ്ഞചെയ്ത രണ്ടു മന്ത്രിമാരടക്കം നാലു മുതിര്‍ന്നനേതാക്കളെ നാരദ ഒളിക്യാമറക്കേസില്‍ പ്രോസിക്യൂട്ട് ചെയ്യാന്‍ ഗവര്‍ണര്‍ ജഗദീപ് ധന്‍കര്‍ അനുമതി നല്‍കി. മന്ത്രിമാരായ സുബ്രത മുഖര്‍ജി, ഫിര്‍ഹാദ് ഹക്കീം, എംഎ‍ല്‍എ. മദന്‍ മിത്ര, തൃണമൂല്‍വിട്ട് ബിജെപി.യിലെത്തിയ സോവന്‍ ചാറ്റര്‍ജി എന്നിവരെ പ്രോസിക്യൂട്ട് ചെയ്യാനാണ് അനുമതി.

മമതാ സര്‍ക്കാരിലെ മന്ത്രിമാരായിരുന്ന ഇവര്‍ കോഴവാങ്ങുന്ന ദൃശ്യങ്ങള്‍ 2016-ല്‍ മാത്യു സാമുവലിന്റെ നാരദാ ചാനല്‍ ഒളിക്യാമറയില്‍ ചിത്രീകരിച്ചിരുന്നു. തുടര്‍ന്ന് കല്‍ക്കത്ത ഹൈക്കോടതി സിബിഐ. അന്വേഷണത്തിന് ഉത്തരവിട്ടു. ഇവര്‍ക്കെതിരേ തെളിവുണ്ടെന്നും പ്രോസിക്യൂഷന് അനുമതി വേണമെന്നും ആവശ്യപ്പെട്ട് ജനവരിയിലാണ് സിബിഐ. ഗവര്‍ണര്‍ക്ക് കത്തയച്ചത്. വെള്ളിയാഴ്ചയാണ് അനുമതി നല്‍കിയുള്ള ഉത്തരവില്‍ ഗവര്‍ണര്‍ ഒപ്പിട്ടത്. ഉടന്‍ കുറ്റപത്രം സമര്‍പ്പിക്കുമെന്ന് സിബിഐ. അറിയിച്ചു.