ഹലാല് സ്റ്റിക്കര് പതിപ്പിച്ചതിന് ബേക്കറി ഉടമയ്ക്കെതിരെ നോട്ടീസ്; ഹിന്ദു ഐക്യവേദി പ്രവര്ത്തകര്ക്ക് ജാമ്യം
ഹലാല് ഭക്ഷണം വിതരണം ചെയ്യുന്നതിനെതിരെ നോട്ടീസ് ഇറക്കിയെന്ന കേസില് ഹിന്ദു ഐക്യവേദി പ്രവര്ത്തകര്ക്ക് ഹൈക്കോടതി മുന്കൂര് ജാമ്യം അനുവദിച്ചു. ധനേഷ് പ്രഭാകരന്, അരുണ് അരവിന്ദ്, സുജയ് സുബ്രഹ്മണ്യന്, ടി.എ. ലെനിന് എന്നിവര്ക്കാണ് ജാമ്യം അനുവദിച്ചത്. മതസൗഹാര്ദം തകര്ക്കും വിധം പ്രവര്ത്തിച്ചു എന്ന കുറ്റം ചുമത്തിയാണ് ഇവര്ക്കെതിരെ പൊലീസ് കേസെടുത്തത്.
അറസ്റ്റിന് സാദ്ധ്യത ഉണ്ടെന്ന് ചൂണ്ടിക്കാട്ടി ഇവര് സമര്പ്പിച്ച ജാമ്യ ഹര്ജിയാണ് ജസ്റ്റിസ് അശോക് മേനോന് പരിഗണിച്ചത്. പ്രതികള് അന്വേഷണ ഉദ്യോസ്ഥന് മുന്പാകെ ഹാജരാവണം. അറസ്റ്റ് ചെയ്യുകയാണങ്കില് അമ്ബതിനായിരം രൂപയും തുല്യ തുകക്കുള്ള രണ്ടാള് ജാമ്യത്തിലും വിട്ടയക്കാനും കോടതി നിര്ദേശിച്ചു.
കുറുമശ്ശേരിയില് പ്രവര്ത്തിക്കുന്ന ബേക്കറിയില് ഹലാല് ഭക്ഷണം വിതരണം ചെയ്യുന്നതിനെതിരെയാണ് ഹിന്ദു ഐക്യവേദി പ്രവര്ത്തകര് നോട്ടീസ് ഇറക്കിയത്. കടയ്ക്ക് മുന്നില് ഹലാല് വിഭവങ്ങള് ലഭിക്കുമെന്ന സ്റ്റിക്കര് കടയുടമ പതിപ്പിച്ചിരുന്നു. ഇത് നീക്കം ചെയ്തില്ലങ്കില് പ്രക്ഷോഭവും ബഹിഷ്ക്കരണവും സംഘടിപ്പിക്കുമെന്നായിരുന്നു നോട്ടീസിലെ മുന്നറിയിപ്പ്. സാമൂഹിക മാദ്ധ്യമങ്ങളില് വിഷയം ചര്ച്ചയായതോടെ പൊലീസ് ഇടപെട്ട് കേസെടുക്കുകയായിരുന്നു.