ആഭ്യന്തര മന്ത്രി രമേശ് ചെന്നിത്തല പങ്കെടുത്ത ഓപ്പറേഷന്‍ തൂഫാന്‍ പരിപാടിയില്‍ ഗുണ്ടാ നേതാവ്
സംസ്ഥാന ആരോഗ്യ/ആഭ്യന്തര വകുപ്പുകൾ ലഹരിക്കെതിരെ നടത്തുന്ന 'ഓപ്പറേഷൻ തൂഫാൻ' ബോധവൽക്കരണ പരിപാടിയിൽ കുപ്രസിദ്ധ ഗുണ്ടാ നേതാവ് പങ്കെടുത്തത് വൻ വിവാദമാകുന്നു. തൃശ്ശൂർ സെന്റ് തോമസ് കോളേജിൽ വെച്ച് നടന്ന പരിപാടിയിലാണ് ആഭ്യന്തര മന്ത്രി രമേശ് ചെന്നിത്തലയോടും മറ്റ് ഉയർന്ന പോലീസ് ഉദ്യോഗസ്ഥരോടുമൊപ്പം തൃശ്ശൂർ ഒല്ലൂർ സ്വദേശിയായ ജിത്തു മോൻ പങ്കെടുത്തത്.
നിരവധി ക്രിമിനൽ കേസുകളിൽ പ്രതിയായ ജിത്തു മോൻ പരിപാടിയിലെ പ്രധാന നിമിഷങ്ങൾ കോർത്തിണക്കി സോഷ്യൽ മീഡിയയിൽ റീൽസ് പോസ്റ്റ് ചെയ്തതോടെയാണ് സംഭവം പുറംലോകമറിഞ്ഞത്. ചടങ്ങിൽ പങ്കെടുത്ത പ്രമുഖ നേതാക്കളോടും ഉയർന്ന പോലീസ് ഉദ്യോഗസ്ഥരോടുമൊപ്പം ഇയാൾ വളരെ അടുപ്പത്തോടെ ഇടപഴകുന്ന ദൃശ്യങ്ങൾ റീലിൽ വ്യക്തമാണ്. ലഹരി വിരുദ്ധ ബോധവൽക്കരണ വേദിയിൽ ഒരു ക്രിമിനൽ പശ്ചാത്തലമുള്ള വ്യക്തിക്ക് എങ്ങനെ പ്രവേശനം ലഭിച്ചു എന്നതിനെച്ചൊല്ലി സോഷ്യൽ മീഡിയയിൽ ഉൾപ്പെടെ കടുത്ത വിമർശനങ്ങളാണ് ഉയരുന്നത്.
സംഭവം വൻ വിവാദമായ പശ്ചാത്തലത്തിൽ ഇന്റലിജൻസ് വിഭാഗം അടിയന്തര അന്വേഷണം ആരംഭിച്ചിട്ടുണ്ട്. ഇതിന്റെ ഭാഗമായി ജിത്തു മോനെ ഒല്ലൂർ പോലീസ് സ്റ്റേഷനിലേക്ക് വിളിച്ചുവരുത്തി ചോദ്യം ചെയ്തു. എന്നാൽ, വിവാദമായ വീഡിയോ ഷൂട്ട് ചെയ്തത് താനല്ലെന്നും മറ്റാരോ പകർത്തിയതാണെന്നുമാണ് ഇയാൾ പോലീസിന് നൽകിയ മൊഴി. ആഭ്യന്തര മന്ത്രിയും പോലീസും പങ്കെടുത്ത ഔദ്യോഗിക ചടങ്ങിൽ ഇന്റലിജൻസ് വീഴ്ചയുണ്ടായോ എന്ന കാര്യവും അധികൃതർ പരിശോധിച്ച് വരികയാണ്.
