സിയാൽ മാതൃക നടപ്പാക്കണം; പ്രധാനമന്ത്രി
കൊച്ചി : സിയാൽ മാതൃകയിൽ രാജ്യത്തെ എല്ലാ സ്റ്റേഡിയങ്ങളുടെയും ഗ്യാലറി മേൽക്കൂരകളിൽ സൗരോർജ പാനലുകൾ സ്ഥാപിക്കണമെന്ന് പ്രധാനമന്ത്രി നരേന്ദ്ര മോഡി. ലോകത്തിലെ ആദ്യ സമ്പൂർണ സൗരോർജ വിമാനത്താവളമെന്ന നേട്ടത്തിന് സിയാലിനെ പ്രധാനമന്ത്രി അഭിനന്ദിച്ചു.
കേരള സന്ദർശനത്തിനിടെ കൊച്ചി വിമാനത്താവളത്തിൽ എത്തിയ പ്രധാനമന്ത്രി സിയാൽ മാനേജിങ് ഡയറക്ടർ വി ജെ കുര്യനുമായി ചർച്ച നടത്തി. സിയാലിന്റെ സൗരോർജ പദ്ധതിയെക്കുറിച്ച് കുര്യൻ പ്രധാനമന്ത്രിയോട് വിശദീകരിച്ചു. ഇത് മികച്ച മാതൃകയാണ്. വൻകിട ഊർജ ഉപഭോഗം വേണ്ടിവരുന്ന സ്ഥാപനങ്ങൾക്കും സൗരോർജ പദ്ധതിയെ ആശ്രയിക്കാമെന്നത് നല്ല കാര്യമാണ്. രാജ്യത്തെ എല്ലാ സ്റ്റേഡിയങ്ങളുടെയും ഗ്യാലറികളുടെ മേൽക്കൂരകളിൽ സിയാൽ മാതൃകയിൽ സൗരോർജ പാനലുകൾ സ്ഥാപിക്കണം. വലിയ സ്ഥാപനങ്ങൾ ഊർജ സ്വയംപര്യാപ്തത കൈവരിക്കുന്നത് രാജ്യത്തിന് ദീർഘകാലാടിസ്ഥാനത്തിൽ ഗുണം ചെയ്യുമെന്നും പ്രധാനമന്ത്രി പറഞ്ഞു.