'ദ ഹിന്ദു'വിൽ വന്നത് പറയാത്ത കാര്യം: മുഖ്യമന്ത്രി

ദ ഹിന്ദു ദിനപത്രത്തിൽ വന്ന അഭിമുഖത്തിലെ വിവാദ പരാമർശത്തിൽ വിശദീകരണവുമായി മുഖ്യമന്ത്രി പിണറായി വിജയൻ. ഹിന്ദുവിൽ വന്നത് താൻ പറയാത്ത കാര്യമാണെന്ന് മുഖ്യമന്ത്രി വ്യക്തമാക്കി. ഹിന്ദു പത്രം അവർക്ക് പറ്റിയ വീഴ്ച സമ്മതിച്ചു. ഏതെങ്കിലുമൊരു മത വിഭാ​ഗത്തെ പ്രത്യേകമായി കുറ്റപ്പെടുത്തുന്ന സമീപനം തന്റെ ഭാ​ഗത്തുനിന്ന് ഉണ്ടായിട്ടില്ല. പ്രത്യേക പ്രദേശത്തിനോ വിഭാ​ഗത്തിനോ എതിരായി തന്റെ ഭാ​ഗത്തുനിന്ന് പരാമർശങ്ങളുണ്ടാകാറില്ല എന്ന് അറിയാമല്ലോ എന്ന് മുഖ്യമന്ത്രി ചോദിച്ചു.


എന്നാൽ വർ​ഗീയ ശക്തികൾ, വർ​ഗീയത എന്നിവയിൽ വിയോജിക്കാറുണ്ട്. അവയെ തുറന്നെതിർക്കാറുമുണ്ട്. അത് ഏതെങ്കിലുമൊരു മതവിഭാ​ഗത്തെയല്ല എതിർക്കുന്നത്. ഇന്ത്യയിലെ ഏറ്റവും വലിയ വർ​ഗീയ നിലപാട് സ്വീകരിക്കുന്ന ആർഎസ്എസിനെ എതിർക്കാറുണ്ട്. അതിന്റെ അർത്ഥം ഹിന്ദുക്കളെ എതിർക്കുന്നുവെന്നല്ല. നമ്മുടെ രാജ്യത്ത് ന്യൂനപക്ഷ വർ​ഗീയതയുണ്ട്, അതിനെ എതിർക്കുന്നതിന്റെ അർത്ഥം ന്യൂനപക്ഷ വിഭാ​ഗങ്ങളെ എതിർക്കുന്നുവെന്നല്ല, അങ്ങനെ കാണാൻ കഴിയില്ല.

ഭൂരിപഷവിഭാ​ഗമായാലും ന്യൂനപക്ഷമായാലും അവയിലെ മഹാഭൂരിപക്ഷം ആളുകളും മതനിരപേക്ഷമായി ചിന്തിക്കുന്നവരാണ്. അവർ വർഗീയതയിൽ അകപ്പെട്ടവരല്ല. വർ​ഗീയതയ്ക്ക് അടിപ്പെട്ടവർ ചെറുഭൂരിപക്ഷമാണ്. ആ വിഭാ​ഗത്തെ ഒറ്റപ്പെടുത്തണമെന്നാണ് സിപിഐഎമ്മിന്റെ നിലപാടെന്നും മുഖ്യമന്ത്രി പറഞ്ഞു.