സാമൂഹ്യനീതി വകുപ്പിന്റെ മുഖാമുഖം: സ്വാഗതസംഘം രൂപീകരിച്ചു

നവകേരള സദസ്സിന്റെ തുടർച്ചയായി മുഖ്യമന്ത്രി പിണറായി വിജയൻ പങ്കെടുക്കുന്ന സാമൂഹ്യനീതി വകുപ്പിന്റെ മുഖാമുഖം സദസ്സിന്റെ നടത്തിപ്പുമായി ബന്ധപ്പെട്ട് സംഘാടക സമിതി രൂപീകരണ യോഗം ചേർന്നു. തിരുവനന്തപുരം ജില്ലയിൽ ഭിന്നശേഷി വിഭാഗക്കാരെയും വയോജനങ്ങളെയും പങ്കെടുപ്പിച്ച് സംഘടിപ്പിക്കുന്ന മുഖാമുഖം പരിപാടിയുടെ സ്വാഗതസംഘം രൂപീകരണ യോഗത്തിന്റെ ഉദ്ഘാടനം സാമൂഹ്യനീതി വകുപ്പ് മന്ത്രി ഡോ.ആർ ബിന്ദു നിർവഹിച്ചു. ഭിന്നശേഷി സൗഹൃദ കേരളം നവകേരള കാഴ്ചപ്പാടിൽ, നവകേരള കാഴ്ചപ്പാട് – വയോജനങ്ങളും സർവ്വീസ് പെൻഷണർമാരും എന്ന ലക്ഷ്യങ്ങളോടെ പ്രമുഖ വ്യക്തിത്വങ്ങളുമായി മുഖ്യമന്ത്രി മുഖാമുഖം സംവദിക്കുന്ന പരിപാടി വൻ വിജയമാക്കി തീർക്കണമെന്ന് മന്ത്രി ഡോ. ആർ ബിന്ദു പറഞ്ഞു.

ഭിന്നശേഷി മേഖലയിലെ പ്രമുഖ വ്യക്തിത്വങ്ങളുമായി മുഖ്യമന്ത്രി നടത്തുന്ന മുഖാമുഖം പരിപാടി ഫെബ്രുവരി 26ന് രാവിലെ 9.30 മുതൽ ഉച്ചയ്ക്ക് 1.30 വരെ തിരുവനന്തപുരം ആർ ഡി ആർ കൺവെൻഷൻ സെൻ്ററിൽ ആണ് നടക്കുക. വയോജനങ്ങളുമായി മുഖ്യമന്ത്രിയുടെ മുഖാമുഖം പരിപാടി ഫെബ്രുവരി 27 ന് രാവിലെ 9.30 മുതൽ ഉച്ചയ്ക്ക് 1.30 വരെ നിയമസഭാ ഹാളിൽ നടക്കും.750 മുതൽ 1000 പേരെ മുഖാമുഖം പരിപാടികളിൽ പങ്കെടുപ്പിക്കണമെന്ന് മന്ത്രി പറഞ്ഞു.

പരിപാടിയിൽ അമ്പതു പേർക്ക് മുഖ്യമന്ത്രിയോട് നേരിട്ട് ചോദ്യങ്ങൾ ചോദിക്കാനുള്ള അവസരം ഉണ്ടാകും. മറ്റുള്ളവർക്ക് തൽസമയം ചോദ്യങ്ങൾ എഴുതി നൽകാനാവും. ഭിന്നശേഷിക്കാർ, ഭിന്നശേഷി മേഖലയിൽ സംഭാവന ചെയ്യുന്ന വ്യക്തിത്വങ്ങൾ, വയോജന പ്രമുഖർ,ഭിന്നശേഷിക്കാരായ കലാ-കായിക-സാംസ്കാരിക പഠന ഗവേഷണ മേഖലകളിലെ പ്രമുഖർ തുടങ്ങിയവരാണ് മുഖാമുഖത്തിൽ പങ്കെടുക്കുകയെന്ന് മന്ത്രി ഡോ.ആർ ബിന്ദു പറഞ്ഞു.

ആയിരത്തിയൊന്ന് അംഗങ്ങളുള്ള ജനറൽ കമ്മിറ്റിയും ഇരുന്നൂറ്റിയൊന്ന് അംഗങ്ങളുള്ള എക്‌സിക്യൂട്ടീവ് അംഗങ്ങളുമുള്ള സംഘാടക സമിതിയാണ് രൂപീകരിച്ചത്. മന്ത്രിമാരായ വി.ശിവൻകുട്ടി, ജി. ആർ അനിൽ എന്നിവർ രക്ഷാധികാരികളാകുന്ന സ്വാഗതസംഘത്തിന്റെ ചെയർപേഴ്സൺ മന്ത്രി ഡോ. ആർ ബിന്ദുവാണ്. എംപിമാരായ എ എ റഹിം, ജോൺ ബ്രിട്ടാസ്, ജില്ലയിലെ എം.എൽ.എമാർ എന്നിവരെ വൈസ് ചെയർപേഴ്സൺമാരായി സമിതി തീരുമാനിച്ചു. സ്വാഗതസംഘം ജനറൽ കൺവീനർ അഡീഷണൽ ചീഫ് സെക്രട്ടറി പുനീത് കുമാറും വിവിധ കമ്മിറ്റി ചെയർമാൻമാരായി ജില്ലയിലെ എം.എൽ. എമാരെയും തീരുമാനിച്ചു.

പി എം ജിയിലെ കേരള സംസ്ഥാന സയൻസ് ടെക്നോളജി മ്യൂസിയം കോൺഫറൻസ് ഹാളിൽ ചേർന്ന യോഗത്തിൽ സാമൂഹ്യനീതി വകുപ്പ് അഡീഷണൽ ചീഫ് സെക്രട്ടറി പുനീത് കുമാർ, സാമൂഹ്യ നീതി വകുപ്പ് ഡയറക്ടർ എച്ച്. ദിനേശൻ, ഡോ. ഇക്ബാൽ, വിവിധ സംഘടനാ ഭാരവാഹികൾ , വകുപ്പ്തല ഉദ്യോഗസ്ഥർ എന്നിവരും പങ്കെടുത്തു.