കൊളസ്ട്രോള്‍ ലെവല്‍ എപ്പോള്‍ പരിശോധിച്ചു തുടങ്ങണം?
ന മ്മുടെ ശാരീരികപ്രവര്‍ത്തനങ്ങള്‍ക്ക് അവശ്യംവേണ്ട ഘടകമാണ് കൊളസ്ട്രോള്‍. മാറിവരുന്ന ജീവിതശൈലിയും ഭക്ഷണശീലങ്ങളുമാണ് കൊളസ്ട്രോളിനെ ഒരു രോഗമാക്കിത്തീര്‍ക്കുന്നത്. ശരീരത്തിലുള്ള കൊളസ്ട്രോളിന്റെ 70 ശതമാനം കരളില്‍ ഉത്പാദിപ്പിക്കുന്നതും 30 ശതമാനം ഭക്ഷണത്തില്‍നിന്നു ലഭിക്കുന്നതുമാണ്.
ഹൃദയസ്തംഭനം, പക്ഷാഘാതം എന്നിവയോടുള്ള ഭീതിയാണ് കൊളസ്ട്രോളിന്റെ പേരില്‍ ആശങ്ക വളര്‍ത്തുന്നത്. എന്നാല്‍ ഹൃദയാരോഗ്യത്തെ ബാധിക്കുന്ന ഒട്ടനവധി ഘടകങ്ങളില്‍ ഒന്നുമാത്രമാണ് ഉയര്‍ന്ന കൊളസ്ട്രോള്‍. പുകവലി, രക്തസമ്മര്‍ദം, പൊണ്ണത്തടി, മദ്യപാനം, മാനസികസമ്മര്‍ദം എന്നിവയൊക്കെ ഒരുമിച്ചുവരുമ്പോഴാണ് കൊളസ്ട്രോള്‍ വില്ലനാകുന്നത്.
പരിശോധനാരീതികള്‍
കൊളസ്ട്രോള്‍ പരിശോധന പലതരത്തിലുണ്ട്. ആകെ അളവ് (ടോട്ടല്‍ കൊളസ്ട്രോള്‍) കണ്ടെത്തുന്നതും ഉപവാസത്തിനുശേഷം നല്ലതും ചീത്തയുമായ ഘടകങ്ങള്‍ വേറിട്ട് സൂചിപ്പിക്കുന്നതും (ലിപിഡ് പ്രൊഫൈല്‍).
എച്ച്.ഡി.എല്‍., എല്‍.ഡി.എല്‍. ട്രൈഗ്ലിസറൈഡ്, വി.എല്‍.ഡി.എല്‍. എന്നിങ്ങനെ കൊളസ്ട്രോളിലെ വിവിധഘടകങ്ങള്‍ പരിശോധിച്ചാണ് ചികിത്സ നിര്‍ദേശിക്കുന്നത്. ഇതില്‍ എച്ച്.ഡി.എല്‍. (40നുമുകളില്‍) ഹൃദയാരോഗ്യത്തിന് ഉത്തമവും എല്‍.ഡി.എല്‍. പ്രശ്‌നക്കാരനുമാണ്.
ആകെ കൊളസ്ട്രോള്‍ കുറഞ്ഞിരിക്കുമ്പോള്‍ത്തന്നെ എല്‍.ഡി.എല്‍. കൂടിയിരിക്കാന്‍ സാധ്യതയുണ്ട്. വ്യായാമമില്ലാത്തവര്‍, തൈറോയ്ഡ് ഹോര്‍മോണ്‍ തകരാറുള്ളവര്‍ എന്നിവര്‍ക്ക് എച്ച്.ഡി.എല്‍. കൊളസ്ട്രോള്‍ കുറവായിരിക്കും.
ആരോഗ്യമുള്ള യുവാക്കള്‍ക്ക് എല്‍.ഡി.എല്‍. 190 വരെ എത്തിയാലും കുഴപ്പമില്ല. മുന്‍പ് ഹൃദയാഘാതം വന്നവരോ ആന്‍ജിയോപ്ലാസ്റ്റി ചെയ്തവരോ ആണെങ്കില്‍ എല്‍.ഡി.എല്‍. കുറഞ്ഞിരിക്കേണ്ടതുണ്ട്.
ഹൃദയത്തിന് അസുഖമുണ്ടായിട്ടുള്ളവര്‍ നൂറില്‍ താഴെയും ഗുരുതരപ്രശ്‌നങ്ങളുണ്ടെങ്കില്‍ എഴുപതില്‍ താഴെയും എല്‍.ഡി.എല്‍. കൊളസ്ട്രോളിന്റെ അളവ് നിലനിര്‍ത്തണം. പ്രമേഹം, അമിതരക്തസമ്മര്‍ദം എന്നിവയുള്ളപ്പോള്‍ ട്രൈട്രൈഗ്ലിസറൈഡും കണക്കിലെടുക്കാറുണ്ട്.
എങ്ങനെ തിരിച്ചറിയാം
കൊളസ്ട്രോള്‍ കൂടുമ്പോള്‍ കാര്യമായ ലക്ഷണങ്ങള്‍ ഉണ്ടാകണമെന്നില്ല. ചിലര്‍ക്ക് ആദ്യഘട്ടത്തില്‍ കഴുത്തിനുപിന്നില്‍ ഉളുക്കുപോലെ കഴപ്പുണ്ടാകാറുണ്ട്. ശ്രദ്ധിക്കാതിരുന്നാല്‍ ഭാവിയില്‍ രക്തക്കുഴലുകളില്‍ തടസ്സങ്ങള്‍ക്കു കാരണമാവും.
ഹൃദയത്തിലേക്കുള്ള രക്തക്കുഴലുകളിലാണ് തടസ്സമെങ്കില്‍ നെഞ്ചുവേദനയും പടികയറുമ്പോള്‍ കിതപ്പും ഉണ്ടാകാറുണ്ട്. കൊറോണറി ധമനികളില്‍ തടസ്സമുണ്ടാകുമ്പോഴാണ് ഇങ്ങനെ സംഭവിക്കുന്നത്.
തലച്ചോറിലേക്കുള്ള രക്തക്കുഴലുകളിലാണ് തടസ്സമെങ്കില്‍ പക്ഷാഘാതസാധ്യത കൂടും. കാലിലേക്കുള്ളതാണെങ്കില്‍ കൂടുതല്‍ സമയം നടക്കുമ്പോള്‍ കഴപ്പും വേദനയും അനുഭവപ്പെടാറുണ്ട്.
എപ്പോള്‍ പരിശോധിക്കണം
ഇരുപത് വയസ്സുമുതല്‍തന്നെ ലിപ്പിഡ് പ്രൊഫൈല്‍ പരിശോധന നടത്തണം. പാരമ്പര്യമായി കൊളസ്ട്രോളിന്റെ അളവുകൂടുന്ന ചില അസുഖങ്ങളുണ്ട്. ഇതു കണ്ടെത്താന്‍ ഈ പരിശോധന സഹായിക്കും. പ്രശ്‌നങ്ങളില്ലെങ്കില്‍ പിന്നീട് അഞ്ചുവര്‍ഷത്തിലൊരിക്കല്‍ മതി. ഹൃദ്രോഗങ്ങളുള്ളവരാണെങ്കില്‍ എല്ലാവര്‍ഷവും പരിശോധന വേണം.
ഒഴിവാക്കേണ്ട ഭക്ഷണങ്ങള്‍
എണ്ണയില്‍ വറുത്ത ഭക്ഷണം, ചുവന്ന ഇറച്ചികൊണ്ടുള്ള വിഭവങ്ങള്‍, പൂരിത കൊഴുപ്പടങ്ങിയ ജങ്ക് ഫുഡുകള്‍ എന്നിവ കുറയ്ക്കണം. ആരോഗ്യവാനാണെങ്കില്‍ ദിവസം രണ്ടു മുട്ട കഴിക്കാം.
ചികിത്സകള്‍
പ്രതിരോധമെന്നനിലയിലാണ് ഗുളികകള്‍ നല്‍കുന്നത്. 40 വയസ്സിനുമുകളിലുള്ള പുരുഷനും 50 കഴിഞ്ഞ സ്ത്രീകള്‍ക്കും ചെറിയ അളവില്‍ കഴിക്കുന്നതുകൊണ്ട് കുഴപ്പമില്ല. സ്റ്റാറ്റിന്‍ മരുന്നുകളാണ് പ്രധാനമായും ഇപയോഗിക്കുന്നത്. ആവശ്യകതയ്ക്കനുസരിച്ച് ഡോസില്‍ വ്യത്യാസമുണ്ടാവും. ബോര്‍ഡര്‍ ലൈനില്‍ ഉള്ളവരാണെങ്കില്‍ ലാബ് റിസള്‍ട്ടുമായി നേരേ മെഡിക്കല്‍ സ്റ്റോറിലേക്കു പോകേണ്ടതില്ല. ആഹാരവും വ്യായാമവും ചിട്ടപ്പെടുത്തിയാല്‍ മതി.
മരുന്നുകള്‍ ഉപയോഗിച്ചുതുടങ്ങിയാല്‍ പെട്ടെന്നു നിര്‍ത്തരുത്. തുടര്‍പരിശോധനകള്‍ നടത്തി കുറവുണ്ടെന്നു കണ്ടാല്‍ ഡോക്ടറുടെ നിര്‍ദേശപ്രകാരം ഡോസ് കുറച്ചശേഷം പതിയെ നിര്‍ത്താം. പെട്ടെന്നു നിര്‍ത്തിയാല്‍ വേഗത്തില്‍ പഴയപടിയാവാന്‍ സാധ്യതയുണ്ട്. അപ്പോള്‍ വീണ്ടും മരുന്നു നല്‍കിയാല്‍ ആദ്യത്തെ ഫലം കിട്ടാന്‍ ഉയര്‍ന്ന ഡോസ് ആവശ്യമാവും.
അതിനാല്‍ ആരോഗ്യപ്രശ്‌നങ്ങളില്ലാത്തവര്‍ക്ക് വ്യായാമം, ഭക്ഷണനിയന്ത്രണം എന്നിവയിലൂടെ മരുന്നുകള്‍ ഇല്ലാതെതന്നെ ഏറെനാള്‍ മുന്നോട്ടുപോകാനാവും.
വിവരങ്ങള്‍ക്ക് കടപ്പാട്
ഡോ. അബ്ദുല്‍ ജബ്ബാര്‍
സീനിയര്‍ കണ്‍സള്‍ട്ടന്റ് ഫിസിഷ്യന്‍