പിഎസ്‌സിയുടെ സ്വീകാര്യത തകര്‍ക്കാൻ ശ്രമം; യൂണിവേഴ്സിറ്റി കോളേജ് അക്രമ സംഭവത്തില്‍ ഉള്‍പ്പെട്ട ആരെയും സംരക്ഷിക്കില്ല: മുഖ്യമന്ത്രി

Ajith.A

24 July 2019 01:13 PM

തിരുവനന്തപുരം : നല്ല നിലയില്‍ പ്രവര്‍ത്തിക്കുന്ന പിഎസ്‌സി പോലുള്ള സ്ഥാപനങ്ങളുടെ വിശ്വാസ്യത തകര്‍ക്കാനുള്ള ശ്രമമാണ് ഇവിടെ നടക്കുന്നത്. 1, 300,00 പിഎസ് സി നിയമനമാണ് സര്‍ക്കാര്‍ അധികാരത്തില്‍ വന്നശേഷം നടന്നത്. 22,000 തസ്തികകളും സൃഷ്ടിച്ചു. തിരുവനന്തപുരത്ത് മാധ്യമങ്ങളെ കാണുകയായിരുന്നു അദ്ദേഹം.

പിഎസ്‌സി യില്‍ നിയമനങ്ങള്‍ ദ്രുതഗതിയില്‍ നടത്തുക എന്നതാണ് ഉദ്ദേശിക്കുന്നത്. നമ്മുടെ സംസ്ഥാനത്ത് പിഎസ്‌സി നേരിട്ടാണ് പരീക്ഷ നടത്തുന്നത്. പുറത്തുനിന്ന് യാതൊരു ഇടപെടലുമില്ല. മറ്റ് സംസ്ഥാനങ്ങളില്‍ അത്തരത്തില്‍ ഇല്ല. അതിനാല്‍ പിഎസ്‌സി ക്ക് വലിയ സ്വീകാര്യതയാണുള്ളത്. അവരുടെ വിശ്വാസ്യത വര്‍ധിച്ചു. സംസ്ഥാനത്തെ ഏറ്റവും വിശ്വാസ്യതയുള്ള ഭരണഘടനാ സ്ഥാപനത്തെ തകര്‍ക്കുന്നത്‌ ഗൗരവതരമായി കാണേണ്ടതുണ്ട്. യൂണിവേഴ്‌സിറ്റി കോളേജിലെ രണ്ട് വിദ്യാര്‍ഥികളുമായി ബന്ധപ്പെട്ട് പിഎസ്‌സിക്കെതിരെ പ്രചരണം നടന്നു. എന്നാല്‍ വസ്തുത അതായിരുന്നില്ലെന്ന് പിന്നീട് വ്യക്തമായി.യൂണിവേഴ്സിറ്റി കോളേജിൽ നിര്‍ഭാഗ്യകരമായ ചില പ്രശ്‌നങ്ങള്‍ ഉണ്ടായി. അക്രമസംഭവത്തില്‍ ഉള്‍പ്പെട്ട ആരെയും സംരക്ഷിക്കില്ല. കര്‍ശനമായ നടപടി സ്വീകരിച്ചിട്ടുണ്ടെന്നും മുഖ്യമന്ത്രി വ്യക്തമാക്കി.