യുവ കലാകാരന്മാർക്കിടയിൽ ശ്രദ്ധേയനാവുകയാണ് RJ ഓസ്‌ക്കർ
ശബ്‍ദംകൊണ്ട് നമ്മളെ കീഴടക്കുന്നവരാണ് റേഡിയോ ജോക്കികൾ. അവരുടെ ശബ്‍ദം തന്നെ ആയിരിക്കും അവരുടെ ഐഡന്റിറ്റി. അങ്ങനെ ഒരാളാണ് RJ ഓസ്‌ക്കർ എന്ന ശ്യാം അടാട്ട്. 12 വർഷമായി RJ രംഗത്ത് സജീവമാണ് ശ്യാം. തൃശൂർ റേഡിയോ മംഗോയിലെ ജോക്കിയായ ശ്യാം വിൻഡ് ഇൻസ്ട്രുമെന്റ് കലാകാരൻ കൂടിയാണ്.
പത്ര പരസ്യംകണ്ട് ഇന്റർവ്യൂവിനു പോയി സ്വന്തം ശൈലികൊണ്ട് മാത്രം ശ്രദ്ധപിടിച്ചുപറ്റിയ ശ്യാം അടാട്ട്, കോളേജിലെ കൂട്ടുകാർ സമ്മാനിച്ച ഓസ്കർ എന്ന വിളിപ്പേര് പ്രൊഫെഷന് ഒപ്പം കൂട്ടുകയായിരുന്നു.
വിൻഡ് ഇൻസ്ട്രുമെന്റിൽ കഴിവ് തെളിയിച്ചു ലോകശ്രദ്ധ നേടുകയാണ് ഓസ്കർ. ഇന്ത്യൻ ഫ്ലൂടിലും വെസ്റ്റേൺ ഫ്ലൂടിലും മാസ്റ്റേഴ്സ് നേടിയിട്ടുണ്ട്. രസിക ബാൻഡിന്റെയും സ്റ്റോറി ടെല്ലർ ബാൻഡിന്റെയും ലീഡിങ് വിൻഡ് ഇൻസ്ട്രുമെന്റ് കലാകാരനാണ് ശ്യാം. തന്റെ ഈ കഴിവിലൂടെ മലയാള സിനിമയിലും തെലുഗ് ഉൾപ്പെടെ അന്യഭാഷാ സിനിമകളിലും ചുവടുറപ്പിക്കുകയാണ്.
ചെറുപ്പം മുതലേ വിൻഡ് ഇൻസ്റ്റ്‌മെന്റുകളോടെ കമ്പമുള്ള ശ്യാം ആദ്യം പഠിച്ചത് കർണാടക സംഗീതമായിരുന്നു. പാലുവായി മുരളീധരൻ എന്ന അധ്യാപകന്റെ കീഴിലായിരുന്നു ശിക്ഷണം. RJയിലും സംഗീതത്തിലും തന്നെയാണ് ശ്യാം തന്റെ ഭാവി കാണുന്നത്. ഈ മേഖലകളിൽ കൂടുതൽ മികവോടെ പ്രവർത്തിക്കാനാകും എന്ന ആത്മവിശ്വാസവും അദ്ദേഹത്തിനുണ്ട്.
2015ലെ ഏറ്റവും മികച്ച റേഡിയോ ജോക്കിക്കുള്ള ഇന്ത്യൻ റേഡിയോ ഫോറം - ഗോൾഡ് അവാർഡ് നേടിയിട്ടുള്ള ശ്യാമിന് വിൻഡ് ഇൻസ്ട്രുമെന്റ് രംഗത്ത് നിരവധി അന്തർദേശീയ പ്രോജെക്റ്റുകൾക്ക് ഒപ്പം പ്രവർത്തിക്കാൻ അവസരം ലഭിച്ചിട്ടുണ്ട്.