എംജി ഹെക്റ്റർ വില പ്രഖ്യാപിച്ചു
മോറിസ് ഗാരേജ് (എംജി) മോട്ടോർ ഇന്ത്യ , തങ്ങളുടെ ഇന്ത്യയിലെ ആദ്യ മോഡൽ എംജി ഹെക്ടർ , ഇന്ത്യയിലെ ആദ്യ ഇന്റർനെറ്റ് കാറെന്ന പ്രഖ്യാപനത്തോടെ പുറത്തിറക്കി. 12,18,000 മുതലാണ് കാറിന്റെ ഇന്ത്യയിലെ എക്സ് ഷോറൂം വില. സ്റ്റൈൽ, സൂപ്പർ, സ്മാർട്ട്, ഷാർപ്പ് എന്നിങ്ങനെ നാല് വേരിയന്റുകളിലാണ് ഹെക്ടർ ഇറങ്ങുന്നത്. ഇതിൽ തന്നെ പെട്രോൾ, ഡീസൽ മോഡലുകളും കമ്പനി അവതരിപ്പിച്ചിട്ടുണ്ട്.
ബ്രിട്ടീഷ് വാഹന നിർമ്മാതാക്കളായ മോറിസ് ഗാരേജ്, ആദ്യമായാണ് ഇന്ത്യയിലേക്ക് വരുന്നത്.1924 ലാണ് കമ്പനി പ്രവർത്തനം ആരംഭിക്കുന്നത്.രാജ്യത്തെ അൻപത് നഗരങ്ങളിലായി 65 ഷോറൂമുകളാണു എംജിക്കു ഇന്ത്യയിൽ ഉള്ളത്.ഗുജറാത്തിലാണ് എംജിയുടെ പ്ലാന്റ് പ്രവർത്തിക്കുന്നത്
മൈക്രോസോഫ്റ്റ്, അഡോബ്, സാപ്, സിസ്കോ തുടങ്ങി നിരവധി കമ്പനികളുടെ ടെക്നോളജി പിന്തുണയോടെ ‘ഐ-സ്മാര്ട്’ സാങ്കേതിക വിദ്യയോടെയാണ് ഇന്റര്നെറ്റ് കാര് അവതരിപ്പിച്ചിരിക്കുന്നത്. ഇന്ബില്റ്റ് സിം മുഖേനയാണ് ഇന്റര്നെറ്റ് കണക്ഷന് സാധ്യമാവുന്നത്. ഇത് സൂചിപ്പിച്ച് കൊണ്ടു തന്നെ ‘ഇന്റര്നെറ്റ് ഇന്സൈഡ്’ എന്ന ബാഡ്ജും വാഹനത്തിന്റെ പുറത്ത് ആലേഖനം ചെയ്തിട്ടുണ്ട്.
ഡീസൽ മോഡൽ നാല് വേരിയന്റുകളിലും ലഭ്യമാകുമ്പോൾ പെട്രോൾ മാന്വൽ ട്രാൻസ്മിഷൻ മോഡൽ സ്റ്റൈൽ, സൂപ്പർ എന്നീ വേരിയന്റുകളിൽ മാത്രമാണ് ഇറങ്ങുന്നത്. ഇതിന്റെ തന്നെ ഹൈബ്രിഡ് മോഡൽ സൂപ്പർ, സ്മാർട്ട്, ഷാർപ് എന്നീ വേരിയന്റുകളിൽ ലഭിക്കുന്നു. ഓട്ടോമാറ്റിക് ട്രാൻസ്മിഷൻ ഇറങ്ങുന്നത് സ്മാർട്ട്, ഷാർപ് എന്നീ വേരിയന്റുകളിൽ മാത്രമാണ്.
ഡീസൽ മോഡലിന് പെട്രോൾ മോഡലിനേക്കാൾ ഒരു ലക്ഷം രൂപ അധികമായിരിക്കും.143 ബിഎച്പി കരുത്തും 250 എൻഎം ടോർക്കും നൽകുന്ന 1.5 ലിറ്റർ ടർബോ ചാർജ്ഡ് പെട്രോൾ എൻജിനും,173 ബിഎച്പി കരുത്തും 3 50 എൻഎം ടോർക്കും നൽകുന്ന 2.0 ലിറ്റർ ഡീസൽ എൻജിൻ മോഡലുമാണ് ഉള്ളത്.കൂടാതെ പെട്രോൾ വാരിയന്റിൽ ഒരു ഹൈബ്രിഡ് മോഡലും കമ്പനി അവതരിപ്പിക്കുന്നു.
4655 എംഎം നീളവും 1835 എംഎം വീതിയും 1760 എംഎം പൊക്കവുമാണ് വാഹനത്തിനു ഉള്ളത്.10 സ്പോക്ക് അലോയ് വീലാണ് ഉപയോഗിച്ചിരിക്കുന്നത്.ആർട്ടിഫിഷ്യൽ ഇന്റലിജൻസ് സാങ്കേതിക വിദ്യ ഉപയോഗിച്ച് പ്രവർത്തിക്കുന്ന വോയിസ് റെക്കഗ്നിഷൻ സിസ്റ്റം, ക്രൂയിസ് കൺട്രോൾ, ഇലക്ട്രോണിക് പാർക്കിംഗ് ബ്രേക്ക്, 360 ഡിഗ്രി ക്യാമറ എന്നിവയും വാഹനത്തിൽ ഉൾക്കൊള്ളിച്ചിരിക്കുന്നു.
ടാറ്റാ ഹരിയർ ,ജീപ്പ് കോമ്പസ് മഹീന്ദ്ര എക്സ് യു വി 500 എന്നിവയാണ് പ്രധാന എതിരാളികൾ.