കൊച്ചി മെട്രോ: തൈക്കൂടം-പേട്ട പാത മുഖ്യമന്ത്രി ഉദ്ഘാടനം ചെയ്തു
കൊച്ചി: ഒന്നാംഘട്ടം പൂര്‍ത്തീകരണത്തിന്റെ പ്രഖ്യാപനത്തോടെ തിങ്കളാഴ്ച കൊച്ചി മെട്രോ സര്‍വീസ് പുനരാരംഭിച്ചു. തൈക്കൂടം മുതല്‍ പേട്ടവരെയുള്ള 1.33 കിലോമീറ്ററിലെ അവസാന പാദത്തിന്റെ കമീഷനിങ്ങും ഇവിടെനിന്നുള്ള ആദ്യ മെട്രോ യാത്രയുടെ ഉദ്ഘാടനവും പിണറായി വിജയന്‍ നിര്‍വഹിച്ചു. പകല്‍ 12.30ന് വീഡിയോ കോണ്‍ഫറന്‍സിങ്ങിലൂടെയായിരുന്നു ഉദ്ഘാടനം.
കോവിഡ് വ്യാപനത്തെ തുടര്‍ന്ന് അഞ്ചുമാസമായി നിലച്ചിരുന്ന മെട്രോ സര്‍വീസ് തിങ്കളാഴ്ച രാവിലെ ഏഴിനുതന്നെ പുനരാരംഭിച്ചു. ഉച്ചയ്ക്കുശേഷം ആലുവ മുതല്‍ പേട്ടവരെയുള്ള 25.48 കിലോമീറ്റര്‍ ദൂരവും മെട്രോ സര്‍വീസുണ്ടാകും. യാത്രാ നിരക്കിലും കുറവുവരുത്തിയിട്ടുണ്ട്. കൂടിയ നിരക്ക് 60 രൂപയായിരുന്നത് 50 രൂപയാക്കി. കൊച്ചി വണ്‍ കാര്‍ഡ് ഉപയോഗിക്കുന്നവര്‍ക്ക് 10 ശതമാനംകൂടി ഇളവ് ലഭിക്കും.
10, 20, 30, 50 രൂപയുടെ നാലു ടിക്കറ്റ് സ്ലാബുകളാണുണ്ടാകുക. 20 രൂപ ടിക്കറ്റില്‍ അഞ്ച് സ്റ്റേഷന്‍വരെയും 30 രൂപയ്ക്ക് 12 സ്റ്റേഷന്‍വരെയും യാത്ര ചെയ്യാം. 12 സ്റ്റേഷനില്‍ കൂടുതലുള്ള യാത്രയ്ക്ക് 50 രൂപ. മിനിമം നിരക്കിലും യാത്രാപരിധിയിലും മാറ്റമില്ല. വീക്ഡേ, വീക്കെന്‍ഡ് പാസുകള്‍ക്കും ഇളവുണ്ട്. 125 രൂപയുണ്ടായിരുന്ന വീക്ഡേ പാസിന് 15 രൂപയും 250 രൂപയായിരുന്ന വീക്കെന്‍ഡ് പാസിന് 30 രൂപയും കുറച്ചു.
തിങ്കളാഴ്ചയും ചൊവ്വാഴ്ചയും പകല്‍ ഒന്നുമുതല്‍ രണ്ടുവരെ മെട്രോ സര്‍വീസുണ്ടാകില്ല. രാവിലെ ഏഴുമുതല്‍ ഒന്നുവരെയും ഉച്ചയ്ക്ക് രണ്ടുമുതല്‍ രാത്രി എട്ടുവരെയും 10 മിനിറ്റ് ഇടവേളയിലായിരിക്കും സര്‍വീസ്. ബുധനാഴ്ച മുതല്‍ രാവിലെ ഏഴിനാരംഭിക്കുന്ന പത്തുമിനിറ്റ് ഇടവിട്ടുള്ള ഓട്ടം പകല്‍ 12ന് അവസാനിക്കും. രണ്ടിന് 20 മിനിറ്റ് ഇടവേളയില്‍ പുനരാരംഭിക്കുന്ന സര്‍വീസ് രാത്രി ഒമ്പതുവരെ തുടരും. ഞായറാഴ്ച രാവിലെ എട്ടിനാകും സര്‍വീസ് തുടങ്ങുന്നത്.
കോച്ചുകളില്‍ വായുസഞ്ചാരം ഉറപ്പാക്കാന്‍ സ്റ്റേഷനുകളില്‍ കുറഞ്ഞത് 20 സെക്കന്‍ഡും ടെര്‍മിനലുകളില്‍ അഞ്ചുമിനിറ്റും ട്രെയിനുകള്‍ നിര്‍ത്തിയിടും. സാധാരണനിലയില്‍ ആറുമിനിറ്റ് ഇടവേളയിലായിരുന്നു മെട്രോ സര്‍വീസ്.
Related News
നിപ വ്യാപനം ഫലപ്രദമായി തടഞ്ഞു; ആശങ്കയൊഴിഞ്ഞെങ്കിലും ജാഗ്രത തുടരണം; മുഖ്യമന്ത്രി
മലമ്പുഴ രക്ഷാദൗത്യം - മുഖ്യമന്ത്രി പിണറായി വിജയന്റെ പ്രതികരണം
മുഖ്യമന്ത്രിയുടെ വാർത്താ സമ്മേളനം തൽസമയം
സിനിമാ താരം നോബിയുടെ മാതാവ് മരണപ്പെട്ടു
