കിയ സെൽറ്റോസ് കേരളത്തിൽ | വില ഇങ്ങനെ
കിയ മോട്ടോഴ്സ് ഇന്ത്യയുടെ ആദ്യ മോഡലായ സെൽറ്റോസ് കേരളത്തിലെത്തി. വാഹനത്തിന്റെ ബുക്കിങ് നേരത്തെ ആരംഭിച്ചിരുന്നു. ജൂലൈ ആദ്യമാണ് സെൽറ്റോസിനെ കിയ ആദ്യമായി പ്രദർശിപ്പിക്കുന്നത്. ഇന്ത്യൻ വാഹന വിപണിയിൽ കടുത്ത മത്സരത്തിനു വേദിയായ ഇടത്തരം എസ് യു വി വിഭാഗത്തിലേക്കാണ് സെൽറ്റോസിന്റെ വരവ്.
ഇന്ത്യൻ വിപണിയിൽ അരങ്ങേറ്റം കുറിക്കുന്ന കിയയ്ക്ക് നിലവിൽ രാജ്യത്തെ 160 നഗരങ്ങളിലായി 265 ടച്ച്പോയിന്റുകളുണ്ട്. വില ഇനിയും പ്രഖ്യാപിച്ചിട്ടില്ലാത്ത 9.69 ലക്ഷം രൂപ മുതലാണ് സൽറ്റോസിന്റെ എക്സ് ഷോറൂം വില ആരംഭിക്കുന്നത്.
മലിനീകരണ നിയന്ത്രണത്തിൽ ബിഎസ് 6 നിലവാരം പുലർത്തുന്ന എൻജിനുകളോടെയാവും സെൽറ്റോസിന്റെ വരവ്. 1.5 ലീറ്റർ പെട്രോൾ, 1.5 ലീറ്റർ ഡീസൽ, 1.4 ലീറ്റർ ടർബോ പെട്രോൾ ഡയറക്ട് ഇഞ്ചക്ഷൻ എൻജിനുകളാവും സെൽറ്റോസിനു കരുത്തേകുക. ഡീസൽ എൻജിനൊപ്പം ആറു സ്പീഡ് മാനുവൽ, ആറു സ്പീഡ് ടോർക്ക് കൺവർട്ടർ ഗീയർ ബോക്സുകളാവും ലഭിക്കുക. 1.5 ലീറ്റർ ഡീസൽ എൻജിനൊപ്പം ആറു സ്പീഡ് മാനുവൽ, സി വി ടി ഗീയർബോക്സുകളാവും ട്രാൻസ്മിഷൻ. 1.4 ലീറ്റർ ടർബോ പെട്രോളിനു കൂട്ട് ആറു സ്പീഡ് മാനുവലോ ഏഴു സ്പീഡ് ഡ്യൂവൽ ക്ലെച് ഓട്ടമാറ്റിക് ഗീയർബോക്സോ ആയിരിക്കും ഉണ്ടാവുക.
സെൽറ്റോസിന്റെ ടോപ് വേരിയന്റിൽ 10.25 ഇഞ്ച് ടച് സ്ക്രീൻ, ഹെഡ് അപ് ഡിസ്പ്ലേ, 360 ഡിഗ്രി എറൗണ്ട് വ്യൂ കാമറ, സൺ റൂഫ്, മൾട്ടി കളർ ആംബിയന്റ് ലൈറ്റിങ്, കൂൾഡ് മുൻ സീറ്റ്, ബോസ് ഓഡിയോ സിസ്റ്റം തുടങ്ങിയവയുണ്ടാവും. 4.3 മീറ്റർ നീളമുള്ള ‘സെൽറ്റോസ്’ ചുവപ്പ്, കറുപ്പ്, നീല, ഓറഞ്ച്, ഗ്ലേഷ്യർ വൈറ്റ്, ക്ലിയർ വൈറ്റ്, സിൽവർ, ഗ്രേ എന്നീ ഒറ്റ നിറങ്ങളിൽ വിൽപ്പനയ്ക്കുണ്ടാവും. കൂടാതെ റെഡ്/ബ്ലാക്ക്, ഗ്ലേഷ്യർ, വൈറ്റ്/ബ്ലാക്ക്, സിൽവർ/ബ്ലാക്ക്, ഗ്ലേഷ്യർ വൈറ്റ്/ഓറഞ്ച് എന്നീ ഇരട്ട വർണ സങ്കലനങ്ങളിലും ‘സെൽറ്റോസ്’ ലഭ്യമാവും.
ടെക്ലൈൻ, ജിടി ലൈൻ എന്നീ വകഭേദങ്ങളിൽ ലഭിക്കുന്ന സെൽടോസിന്റെ ടെക്ലൈനിന്റെ വില 9.69 ലക്ഷം മുതൽ 15.99 ലക്ഷം വരെയും ജിടിലൈനിന്റേത് 13.49 ലക്ഷം മുതൽ 15.99 ലക്ഷം രൂപ വരെയുമാണ്. ടെക് ലൈൻ 1.5 ലീറ്റർ പെട്രോൾ ഡീസൽ എൻജിനുകളോടെ ലഭിക്കുമ്പോൾ ജിടി ലൈൻ 1.4 ലീറ്റർ ടർബോ പെട്രോൾ എൻജിനോടെയാണ് വിപണിയിലെത്തിയത്.
കഴിഞ്ഞ മാസം 15 മുതൽ 32035 പ്രീബുക്കിങ്ങുകൾ വാഹനത്തിന് ലഭിച്ചു എന്നാണ് കിയ അറിയിച്ചത്. ഹ്യുണ്ടേയിയുടെ സഹസ്ഥാപനമായ കിയ മോട്ടോഴ്സിന്റെ ഇന്ത്യയിലെ ആദ്യ വാഹനമായ സെൽറ്റോസിന് മികച്ച വിജയം ലഭിക്കും എന്നാണ് കമ്പനി പ്രതീക്ഷ.