ഈ അടുത്ത് പുറത്തു വന്ന, ഒരു സർവ്വേ പ്രകാരം യുവാക്കൾക്കിടയിൽ 52% പേർ, മാംസാഹാരം ഉപേക്ഷിക്കാൻ കഴിയാത്തതുകൊണ്ട് പല ഡയറ്റ് പ്ലാനുകളും പാതി വഴിയിൽ ഉപേക്ഷിച്ചവരാണ്. നമ്മളിൽ പലരുടെയും കഥ മറ്റൊന്ന് അല്ല. 

 

അങ്ങനെ മാംസാഹാരം ഉപേക്ഷിക്കാൻ കഴിയാത്ത ഒരാളാണോ നിങ്ങൾ ?. ഇതേ കാരണത്താൽ പല ഡയറ്റ് പ്ലാനുകളും പാതി വഴിയിൽ ഉപേക്ഷിക്കേണ്ടി വന്നിട്ടുണ്ടോ? അമിതവണ്ണം നിങ്ങളെ അലട്ടുന്ന ഒരു പ്രശ്നം ആണോ? എന്നാൽ നിങ്ങൾക്ക് ചെയ്യാൻ കഴിയുന്ന, ഉപകരിക്കുന്ന, വളരെ ചുരുങ്ങിയ കാലയളവിൽ ഫലം കിട്ടുന്ന ഒരു ഡയറ്റിനെ കുറിച്ചാണ് ഇവിടെ പറയുന്നത് - കീറ്റോ ഡയറ്റ്. സിനിമ താരങ്ങളും മറ്റു സെലിബ്രിറ്റികളും ഇതിനെ കൂടുതൽ ആശ്രയിക്കുന്നത് കൊണ്ട്, ഇത് സെലിബ്രിറ്റി ഡയറ്റ് എന്നും അറിയപ്പെടുന്നു.

 

പല തരത്തിലുള്ള ഡയറ്റ് പ്ലാനുകൾ ആളുകൾ മാറി മാറി പരീക്ഷിക്കാറുണ്ട് എന്നാൽ വളരെ ശ്രദ്ധിച്ച്‌ തെരഞ്ഞെടുക്കേണ്ട ഒന്നാണ് ഡയറ്റുകൾ. ജീവിതശൈലി, സ്വന്തം ശരീരപ്രകൃതി, സാമ്പത്തിക സ്ഥിതി, സമയ ലഭ്യത  എന്നിവ എല്ലാം കണക്കിലെടുത്താണ് ഒരു ഡയറ്റ് തെരഞ്ഞെടുക്കേണ്ടത്.

 

 

 

ശരീരത്തിന് ആവശ്യമായ ഊർജ്ജം ലഭിക്കുന്നത് പ്രധാനമായും അന്നജത്തിൽ (കാർബോഹൈഡ്രേറ്റ്) നിന്നും കൊഴുപ്പിൽ (ഫാറ്റ്) നിന്നുമാണ്. അരിയിലും ഗോതമ്പിലും മധുരപലഹാരങ്ങളിലും കൂടുതലായി അടങ്ങിയിരിക്കുന്നത് അന്നജമാണ്‌. ഈ അന്നജത്തിന്റ്റെ അളവ് കുറച്ചു ഫാറ്റ് കൂട്ടി, മിതമായ പ്രോട്ടീനും ശരീരത്തിന് നൽകുന്ന രീതിയിലാണ് കീറ്റോ ഡയറ്റിൽ ആഹാരം ക്രമീകരിച്ചിരിക്കുന്നത്. കാർബോഹൈഡ്രേറ്റ് കുറയുന്നതിനാൽ ശരീരം കൊഴുപ്പിൽ നിന്നും ഊർജ്ജം ഉല്പാദിപ്പിക്കാൻ നിർബന്ധിതമാകുന്നു. ശരീരം കൊഴുപ്പിനെ കീറ്റോണാക്കി മാറ്റുകയാണ്  (ഫാറ്റ് --> ആസിഡ്  --> കീറ്റോൺ) ഇവിടെ നടക്കുന്നത്. ഈ കീറ്റോണിനെ ഊർജ്ജമായി ഉപയോഗിച്ച് ശരീരം പ്രവർത്തിക്കുന്നു. ഇങ്ങനെയാണ് ഈ ഭക്ഷണ രീതിയിലൂടെ ശരീരഭാരം വേഗത്തിൽ കുറയുന്നത്.

 

 

 

ഇത് അടിസ്ഥാനപരമായി ഒരു നോൺ വെജ് ഡയറ്റ് ആണ്. ചില മാറ്റങ്ങൾ വരുത്തി വെജ് ഡയറ്റായും ഉപയോഗിക്കുന്നവർ ഉണ്ട്. പാശ്ചാത്യ രാജ്യങ്ങളിൽ തുടർന്നുവന്ന ഒരു ഭക്ഷണ രീതിയായതിനാൽ അടിസ്ഥാനപരമായി ഇതിൽ ഉൾപ്പെട്ട ഭക്ഷണപദാർത്ഥങ്ങളുടെ  ലഭ്യത  നമ്മുടെ നാട്ടിൽ കുറവാണ്. മധുരം ഇല്ലാത്തതോ, മധുരം തീരെ കുറഞ്ഞതോ ആയ ഭക്ഷണ പദാർത്ഥങ്ങൾ ആണ് ഇതിൽ ഉൾപെടുത്തേണ്ടത്. ആവിയിൽ വേവിക്കുന്ന ഭക്ഷണ പദാർത്ഥങ്ങൾ ആണ് ഉചിതമെങ്കിലും ചെറിയരീതിയിൽ ഒലിവ് ഓയിൽ, വെളിച്ചെണ്ണ എന്നിവ ഉപയോഗിക്കുന്നത്തിൽ തെറ്റില്ല. ഇനി പറയുന്നവ ഭക്ഷണത്തിൽ ഉൾപെടുത്തുക.

 

ചിക്കൻ, മട്ടൺ, ബീഫ്, മത്സ്യം, മുട്ട 

തൈര്, ബട്ടർ, ചീസ്, ബദാം, കശുവണ്ടി പരിപ്പ്, വോൾനട്ട്, റാഗി

ചീര, മുരിങ്ങയില, വെള്ളരിക്ക, വഴുതനങ്ങ, പാവയ്ക്ക, വെണ്ടയ്ക്ക, പടവലങ്ങ, വാഴക്കൂമ്പ്, കോവയ്ക്ക, ബ്രോക്കോളി, സുക്കിനി, അവോകാഡോ, ക്യാബേജ്, ബീൻസ്.

അധികം മധുരമില്ലാത്ത എല്ലാ പഴവര്ഗങ്ങളും

നിങ്ങളുടെ വീട്ടിൽ അല്ലെങ്കിൽ നാട്ടിൽ ലഭ്യമായ കാർബോഹൈഡ്രേറ്റ് കുറഞ്ഞ ഏതൊരു ഭക്ഷണ പദാർത്ഥങ്ങളും ഡയറ്റിൽ ഉൾപ്പെടുത്താം.

ഈ ഡയറ്റ് എടുക്കുമ്പോൾ ധാരാളം വെള്ളം കുടിക്കേണ്ടതുണ്ട്.

 

 

 

വെളുത്ത അരിയുടെ ചോറ്, വാഴപ്പഴം, ഉരുളകിഴങ്ങ്, കാര്ബണേറ്റഡ് ഡ്രിങ്സ്, മധുര പലഹാരങ്ങൾ എന്നിവ പൂർണമായും ഒഴുവാക്കുക.

 

പാൽ ഒഴുവാക്കുന്നതാവും ഉത്തമം.

 

 

 

ഗർഭിണികൾ, മുലയൂട്ടുന്ന അമ്മമാർ, പ്രമേഹ രോഗികൾ, ഹൃദ് രോഗികൾ, ഹോർമോൺ പ്രശ്നങ്ങൾ ഉള്ളവർ എന്നിവർക്ക് ഈ ഡയറ്റ് കൊണ്ട് ഉദ്ദേശിച്ച ഫലം ലഭിക്കണം എന്നില്ല, മാത്രമല്ല അങ്ങനെ ഉള്ളവർക്ക് ചില ആരോഗ്യ പ്രശ്നങ്ങൾ ഉണ്ടാകാനും ഇടയുണ്ട്;  അതിനാൽ ഇവർ ഈ ഡയറ്റ് എടുക്കുന്നതിനു മുൻപ് ഡോക്ടറുടെ അഭിപ്രായം ആരായുന്നത് ഉചിതമായിരിക്കും.