കേരള പോലീസിന് മൂന്ന് സ്കോച്ച് അവാര്ഡുകള്
കേരള പോലീസിന്റെ മൂന്ന് പദ്ധതികള് ഇക്കൊല്ലത്തെ സ്കോച്ച് അവാര്ഡിന് അര്ഹമായി. വെര്ച്ച്വല് ക്യു, ഇ-വി ഐ പി, ഒ റ്റി പി തട്ടിപ്പുകള് തടയുന്നതിന് ബാങ്കുകളുമായി ചേര്ന്ന് തയ്യാറാക്കിയ വാട്സ് ആപ്പ് സംവിധാനം എന്നിവയ്ക്കാണ് അവാര്ഡ് ലഭിച്ചത്. ഒരു സ്വതന്ത്ര സംഘടന പ്രഖ്യാപിക്കുന്ന രാജ്യത്തെ എറ്റവും വലിയ സിവിലിയന് ബഹുമതിയാണ് സ്കോച്ച് അവാര്ഡ്. ന്യൂഡല്ഹിയില് നടന്ന ചടങ്ങില് ക്രൈം ബ്രാഞ്ച് തിരുവനന്തപുരം റേഞ്ച് ഐ.ജി എസ്.ശ്രീജിത്ത് അവാര്ഡ് ഏറ്റുവാങ്ങി.
2018 ലെ പ്രളയ സമയത്ത് നടത്തിയ രക്ഷാപ്രവര്ത്തനങ്ങള്ക്ക് കഴിഞ്ഞ വര്ഷം കേരള പോലീസിന് സ്കോച്ച് ഗോള്ഡ് അവാര്ഡ് ലഭിച്ചിരുന്നു. സ്റ്റുഡന്റ് പോലീസ് കേഡറ്റ്, പിങ്ക് പോലീസ് പട്രോള്, പാതി വഴിക്ക് പഠനം നിര്ത്തുന്ന കുട്ടികളെ തുടര്ന്ന് പഠിക്കാന് പ്രേരിപ്പിക്കുന്ന ഹോപ് പദ്ധതി എന്നിവയ്ക്കും കഴിഞ്ഞ വര്ഷം സ്കോച്ച് ഓണര് ഓഫ് മെറിറ്റ് അവാര്ഡ് ലഭിച്ചിരുന്നു.
ശബരിമലയില് എത്തുന്ന തീര്ത്ഥാടകര്ക്ക് കാത്തുനില്ക്കാനുള്ള വരിയില് നിശ്ചിത ദിവസം നിശ്ചിത സമയത്ത് സ്ഥാനം റിസര്വ് ചെയ്യാന് കഴിയുന്ന സംവിധാനങ്ങളാണ് ശബരിമല വെര്ച്ച്വല് ക്യു സിസ്റ്റം. റിസര്വ് ചെയ്യുമ്പോള് ലഭിക്കുന്ന കൂപ്പണ് ശബരിമലയിലെ പ്രത്യേക കൗണ്ടറില് കാണിച്ച് വരിയില് സ്ഥാനം ഉറപ്പിക്കാം. കഴിഞ്ഞ തീര്ത്ഥാടന കാലങ്ങളില് ലക്ഷക്കണക്കിന് പേരാണ് ഈ സംവിധാനം വിനിയോഗിച്ചത്.
പാസ്പോര്ട്ട് അപേക്ഷകളുടെ പരിശോധനയ്ക്ക് നേരത്തേ മാസങ്ങളെടുത്തിരുന്നു. ഈ കാലതാമസം ഒഴിവാക്കുന്നതിനായി 2017 ല് കേരള പോലീസ് നടപടികള് ആരംഭിച്ചു. പോലീസിലെ സാങ്കേതികവിദഗ്ദ്ധര് നിര്മ്മിച്ച ഇ-വി ഐ പി വെര്ഷന് 1.0 എന്ന സംവിധാനം തൃശ്ശൂര് റൂറല് പോലീസ് ജില്ലയില് നടപ്പിലാക്കി. രാജ്യത്തുതന്നെ ഏറ്റവും കൂടുതല് പാസ്പോര്ട്ട് വിതരണം ചെയ്യുന്ന ജില്ലയായ മലപ്പുറത്ത് ഈ സംവിധാനം പരീക്ഷണാടിസ്ഥാനത്തില് നടപ്പാക്കിയത് വന് വിജയമായിരുന്നു. തുടര്ന്ന് 19 പോലീസ് ജില്ലകളിലേക്കും ഇത് വ്യാപിപ്പിച്ചു. പോലീസ് ക്ലിയറന്സ് ലഭിക്കുന്നതിനുളള കാലയളവ് 48 മണിക്കൂര് മുതല് 120 മണിക്കൂര് വരെയാക്കി ചുരുക്കാന് ഇതുവഴി കഴിഞ്ഞു. സുരക്ഷാസംവിധാനങ്ങള് വര്ദ്ധിപ്പിക്കുന്നതിനും മനുഷ്യ ഇടപെടലുകള് ഒഴിവാക്കുന്നതിനും മുന്ഗണന നല്കി ബ്ലോക്ക് ചെയിന് സാങ്കേതികവിദ്യയുടെ സഹായത്തോടെ ഇ - വി ഐ പി വെര്ഷന് 2.0 വികസിപ്പിച്ചുവരുകയാണ്. പുതിയ സംവിധാനം ഏര്പ്പെടുത്തുന്നതോടെ പോലീസ് ക്ലിയറന്സ് ലഭിക്കുന്നതിനുളള സമയപരിധി 24 മണിക്കൂര് മുതല് 72 മണിക്കൂര് വരെയായി ചുരുങ്ങും.
ഓണ്ലൈന് ബാങ്കിംഗ് സേവനങ്ങള് പ്രയോജനപ്പെടുത്താന് ലഭിക്കുന്ന വണ്ടൈം പാസ്സ് വേര്ഡ് കൈക്കലാക്കി നടത്തുന്ന തട്ടിപ്പ് തടയുന്നതിന് വിവിധ ബാങ്കുകളുമായി ചേര്ന്ന് കേരള പോലീസ് ഒരു വാട്സ് ആപ്പ് സംവിധാനത്തിന് രൂപം നല്കിയിട്ടുണ്ട്. പോലീസ് ഉദ്യോഗസ്ഥരും ബാങ്കിന്റെ പ്രതിനിധികളും ഉള്പ്പെടുന്ന ഈ സംവിധാനം മുഖേന തട്ടിപ്പിനിരയാകുന്നവരുടെ പരാതികള് എത്രയും വേഗം ബാങ്കിന്റെ പരിഗണനയില് എത്തിക്കാനും പണം തിരികെ നല്കാനും കഴിയുന്നു.