വിവരങ്ങളിലെ വിവാദം; സ്പ്രിംഗ്ളറെ ഒഴിവാക്കി ഉത്തരവ്
തിരുവനന്തപുരം: വിവാദമായ കോവിഡ് വിവരശേഖരണ നപടിയില് മലക്കംമറിഞ്ഞ് സര്ക്കാര്. അമേരിക്കന് കമ്പനിയായ സ്പ്രിംഗ്ളര് വഴിയുള്ള കോവിഡ് വിവരശേഖരം അവസാനിപ്പിച്ച് സര്ക്കാര്. കോവിഡ് രോഗികളുടെ വിവരങ്ങള് ഇനി സര്ക്കാര് വെബ്സൈറ്റില് അപ്ലോഡ് ചെയ്താല് മതിയെന്നാണ് പുതിയ ഉത്തരവ്. നിരീക്ഷണത്തിലുള്ളവരുടെ വിവരങ്ങളും അപ്ലോഡ് ചെയ്യേണ്ട. തദ്ദേശഭരണവകുപ്പാണ് പുതിയ നിര്ദേശം നല്കിയിരിക്കുന്നത്. കമ്പനിയുടെ സൈറ്റില്നിന്ന് ഐടി സെക്രട്ടറി ഉള്പ്പെട്ട പരസ്യവും നീക്കിയിട്ടുണ്ട്. സ്പ്രിംഗ്ളര് വഴി വിവരങ്ങള് ചോര്ത്തുന്നുവെന്ന് ആരോപിച്ച് പ്രതിപക്ഷം രംഗത്ത് വന്നിരുന്നു.
കോവിഡ് നിരീക്ഷണത്തില് കഴിയുന്നവരുടെ വിവരങ്ങള് അമേരിക്കന് സ്വകാര്യ കമ്പനിക്ക് സര്ക്കാര് വില്ക്കുകയാണെന്നാണ് പ്രതിപക്ഷ നേതാവ് രമേശ് ചെന്നിത്തല ആരോപിച്ചു. സര്ക്കാര് തലത്തില് ശേഖരിക്കുന്ന വിവരം സംസ്ഥാന സര്ക്കാരിന്റെ ഡാറ്റാ സെന്ററിലേക്ക് എന്തുകൊണ്ട് അപ്ലോഡ് ചെയ്യുന്നില്ല? സംസ്ഥാന സര്ക്കാരിന് കീഴിലുള്ള സിഡിറ്റിനോ ഐടി മിഷനോ ചെയ്യാന് കഴിയുന്ന ജോലി അമേരിക്കന് കമ്പനിയെ ഏല്പിച്ചത് എന്തിനാണ്? സ്പ്രിംഗ്ളര് ശേഖരിക്കുന്ന വിവരങ്ങള് കമ്ബനി മറിച്ചു വില്ക്കുകയില്ലെന്ന് എന്ത് ഉറപ്പാണ് മുഖ്യമന്ത്രിക്ക് നല്കാന് കഴിയുക? തുടങ്ങിയ ചോദ്യങ്ങളാണ് ചെന്നിത്തല ഉന്നയിച്ചത്. പ്രതിപക്ഷ നേതാവ് പറയുന്നതു പോലെ സ്പ്രിംഗ്ളര് ഒരു പിആര് കമ്പനി അല്ല എന്നായിരുന്നു മുഖ്യമന്ത്രിയുടെ മറുപടി.